पहिले प्रदेशसभामा पराजित, अहिले प्रतिनिधिसभाका उम्मेदवार

२०७४ सालको प्रदेशसभा निर्वाचनमा पराजित महर्जन जित सुनिश्चित भएको दाबीसहित ललितपुर क्षेत्र नम्बर २ बाट नेपाली कांग्रेसको उम्मेदवार बनेका छन् ।

०००

ललितपुर निर्वाचन क्षेत्र नम्बर २ बाट नेपाली कांग्रेसले प्रेमकृष्ण महर्जनलाई प्रतिनिधिसभा निर्वाचनमा उम्मेदवार बनाएको छ । ललितपुरमा जन्मिएका ५९ वर्षीय महर्जनको स्थायी ठेगाना ललितपुर महानगरपालिका, दुपाट हो ।

तेजलाल महर्जनका छोरा प्रेमकृष्णले एसएलसीसम्म अध्ययन गरेका छन् । उनी नेपाली कांग्रेसका पुराना नेता हुन् । आफ्नो क्षेत्रमा रैथाने उम्मेदवारको रूपमा चिनिन्छन् ।

२०७४ सालको प्रतिनिधिसभा चुनावमा उनी ललितपुर क्षेत्र नम्बर २ (ख) बाट प्रदेशसभा सदस्यको उम्मेदवार बनेका थिए । त्यसबेला ९,४२० मत पाए तर जितेनन् । दोस्रो स्थानमा रहे । विजेता बने, एमालेका ज्ञानेन्द्र शाक्य ।

२०८२ सालको प्रतिनिधिसभा चुनावमा फेरि उनै महर्जनलाई कांग्रेसले ललितपुर-२ बाट उम्मेदवार बनाएको छ ।

मनोनयन दर्ता गरेपछि उनले पार्टी भित्र एकता कायम गरेर जित सुनिश्चित गर्ने बताएका छन् । ‘यस पटक नेपाली कांग्रेसले नयाँ नेतृत्वसहित बदलिएर आएकोले हाम्रो जित सुनिश्चित छ,’ उनले भनेका छन् ।

उनले ललितपुर महानगरपालिका र प्रदेश सांसदहरूका कामलाई आफ्नो जितको आधार मानेको देखिन्छ ।

साथै आफ्नो क्षेत्रको सम्भावना र समस्या नजिकबाट बुझेको रैथाने उम्मेदवारको रूपमा आफूलाई चिनाउने कोसिस गरिरहेका छन् ।

यो क्षेत्रका मुख्य प्रतिस्पर्धीहरूमा नेकपा एमालेबाट प्रेमबहादुर महर्जन (निवर्तमान सांसद), राष्ट्रिय स्वतन्त्र पार्टीबाट जगदीश खरेल, नेपाली कम्युनिस्ट पार्टीबाट राजेन्द्र अमात्य लगायतका उम्मेदवार छन् ।

यस क्षेत्रमा गत निर्वाचनमा भने एमाले उम्मेदवार प्रेमबहादुर महर्जनले अन्य प्रतिस्पर्धीलाई फराकिलो अन्तरले पछि पारेका थिए ।

अघिल्लो चुनावमा गठबन्धन गरेको कांग्रेसले यस पटक एकल रूपमा प्रेमकृष्ण महर्जनलाई उम्मेदवार बनाएको हो । आसन्न चुनावमा ललितपुर-२ मा दल र स्वतन्त्र गरी २३ उम्मेदवार छन् ।