दोस्रो जित निकाल्ने दाउ

अघिल्लो निर्वाचनमा फराकिलो जित निकालेका महर्जन आसन्न प्रतिनिधिसभा निर्वाचनमा दोस्रो जित निकाल्ने योजनासहित मैदानमा छन् ।

०००

ललितपुर निर्वाचन क्षेत्र नम्बर २ मा नेकपा एमालेका तर्फबाट प्रेमबहादुर महर्जन प्रतिनिधिसभा उम्मेदवार छन् । ललितपुरमा जन्मिएका ५९ वर्षीय महर्जन ललितपुर महानगरपालिका, गुइटोलका स्थानीय बासिन्दा हुन् ।

औपचारिक शिक्षाको हकमा उनले मास्टर्स (स्नातकोत्तर) पूरा गरेका छन् । ज्यापु समाजको अध्यक्षसमेत रहेका महर्जन २०७९ सालको प्रतिनिधिसभा चुनावमा ललितपुर क्षेत्र नम्बर २ बाट १५,०२५ मत ल्याएर निर्वाचित भएका थिए ।

उनका निकटतम प्रतिद्वन्द्वी हाम्रो नेपाली पार्टीका सुदिन शाक्यले ८,८८६ मत पाए भने राष्ट्रिय स्वतन्त्र पार्टीका बुद्धरत्न महर्जनले ८,६६६ मत ल्याएका थिए ।

गत निर्वाचनमा जितेका एमाले उम्मेदवार प्रेमबहादुर महर्जनले अन्य प्रतिस्पर्धीलाई फराकिलो अन्तरले पछि पारेका थिए । दोस्रो स्थानका लागि भने तीन दलले प्रतिस्पर्धा गरेका थिए ।

महर्जन तत्कालीन समयमा १५ हजार २५ मत प्राप्त गरी निर्वाचित भए । उनले निकटम प्रतिद्वन्द्वीलाई ६ हजार बढी मतले पछि पारेका थिए ।

दोस्रो, तेस्रो र चौथो स्थानको मत प्राप्त गर्ने तीन उम्मेदवारको एक आपसको मतान्तर भने न्यून थियो । हाम्रो नेपाली पार्टी, रास्वपा र एकीकृत समाजवादीका तीन उम्मेदवारले मत ८ हजार कटाए पनि ९ हजार माथि पुग्न सकेनन् ।

हाम्रो नेपाली पार्टीका उम्मेदवार सुदिन शाक्यले ८ हजार ८८६, रास्वपाका बुद्दरत्न महर्जनले ८ हजार ६६६ र एकीकृत समाजवादीका कृष्णलाल महर्जनले ८ हजार २६४ मत प्राप्त गरे । कृष्णलाललाई कांग्रेस र तत्कालीन माओवादी केन्द्रको समर्थन हुँदा समेत उनी चौथो स्थानको मत प्राप्त गरे ।

विगतमा सोही क्षेत्रबाट जित हासिल गरेका महर्जनलाई एमालेले २१ फागुनमा हुने प्रतिनिधिसभा चुनावमा पनि उम्मेदवार बनाएको हो ।

उनका मुख्य प्रतिस्पर्धीहरूमा राष्ट्रिय स्वतन्त्र पार्टीबाट जगदीश खरेल (निवर्तमान सञ्चार मन्त्री), नेपाली कांग्रेसबाट प्रेमकृष्ण महर्जन, नेकपाबाट राजेन्द्र अमात्य लगायत छन् ।

दोहोरिएर ललितपुर-२ मा उम्मेदवार बनेर जित निकालेका महर्जन मजबुत संगठन र स्थानीयस्तरमा भिजेर काम गरेका कारण आफ्नो जित सुनिश्चित भएको दाबी गर्छन् । तर, नयाँ उम्मेदवारहरूको चुनौती पनि उनलाई उत्तिकै छ ।