पूर्वसहकर्मी शाही र कांग्रेसका खड्गसँग रोकायाको त्रिपक्षीय भिडन्त

विगतमा चुनाव जितेर मन्त्री भइसकेका उनै पूर्वसहकर्मी शाही लगायतका उम्मेदवारहरूलाई रोकेर चुनाव जित्ने प्रयासमा एमालेका रोकाया रहेका छन् ।

000

१५ वैशाख २०२८ सालमा मुगुको मुगुम कार्मारोङ गाउँपालिका छायलमा जन्मिएका हुन् पूर्णबहादुर रोकाया । रोकायलाई नेकपा एमालेले मुगुबाट प्रतिनिधिसभा सदस्य निर्वाचनमा उम्मेदवार बनाएको छ । यो उनको पहिलो संसदीय चुनावी यात्रा हो ।

त्रिभुवन विश्वविद्यालयबाट एमएड गरेका उनी राजनीतिमा भने लामो समयदेखि सक्रिय छन् । निर्वाचनमा रोकायाको चुनावी प्रतिस्पर्धा पूर्वसहकर्मीसँगै छ । मुगुमा नेपाली कम्युनिस्ट पार्टीबाट चन्द्रबहादुर शाही उम्मेदवार छन् । शाही र रोकाया दुवै नेकपा एमाले पृष्ठभूमिका नेता हुन् । एमाले विभाजन भएर नेकपा एकीकृत समाजवादी बन्दा शाही त्यसमै लागे । उनी नेपाली कम्युनिस्ट पार्टीबाट उम्मेदवार छन् । शाही २०७४ सालमा एमालेबाट प्रदेशसभा सदस्य निर्वाचित भएका थिए । चुनाव जितेपछि कर्णाली सरकारको भूमि व्यवस्था, कृषि तथा सहकारी मन्त्री भए ।

विगतमा चुनाव जितेर मन्त्री भइसकेका उनै पूर्वसहकर्मी शाही लगायतका उम्मेदवारहरूलाई रोकेर चुनाव जित्ने प्रयासमा एमालेका रोकाया रहेका छन् ।

२०७९ मा मुगुबाट नेपाली कांग्रेसका ऐनबहादुर शाही ठकुरी १४ हजार ७०६ मत ल्याएर निर्वाचित भएका थिए । दोस्रोमा एमालेका राजबहादुर कार्की थिए । कार्कीले १० हजार ७१० मत ल्याएका थिए । यसपटक कांग्रेसबाट खड्ग शाही उम्मेदवार छन् ।

२०७४ सालमा भने मुगुबाट एमालेका गोपालबहादुर बम १३ हजार ३४ मत ल्याएर विजयी भएका थिए । त्यसबेला कांग्रेसका हस्तबहादुर मल्ल ९ हजार ८६१ मत ल्याएर दोस्रो भएका थिए ।

यसपटकका एमालेका उम्मेदवार रोकाया अघिल्लो निर्वाचनमा कांग्रेससँग पार्टीको हारको बदला लिने दाउमा छन् । यसका लागि उनले पार्टीभित्रको अन्तरविरोध व्यवस्थापन गर्दै युवा मत तान्ने प्रयास गरिरहेका छन् ।

मुगुमा राष्ट्रिय प्रजातन्त्र पार्टी (राप्रपा) बाट बलबहादुर मल्ल, राष्ट्रिय स्वतन्त्र पाटीबाट भुवन टमाटा, प्रगतिशील लोकतान्त्रिक पार्टीबाट ऐटन मल्ल, नेपाल कम्युनिस्ट पार्टी (माओवादी) बाट रंगवीर परियार पनि उम्मेदवार छन् ।