मत खोज्दै युवा नेता

गुल्मी जिल्ला, मुसिकोट–२ मा २०४८ असार २५ गते जन्मिएका श्रीराम महत वामपन्थी पृष्ठभूमिमा हुर्किए । उनको औपचारिक राजनीति एमालेको विद्यार्थी संगठनबाट शुरु भयो ।

२०६३ सालदेखि राजनीतिमा लागेका महतले २०७४ सालमा रेसुङ्गा क्याम्पसमा स्ववियु सभापतिको जिम्मेवारी सम्हाले ।

त्यसपछि युवा संघ गुल्मी जिल्ला अध्यक्ष बने । २०७८ मा एमाले विभाजन भएपछि महत नेकपा (एकीकृत समाजवादी)को जिल्ला अध्यक्ष बने । एकीकृत समाजवादीको केन्द्रीय सदस्य रहेका महतले करीब १० वर्ष शिक्षण गरे ।

२०७९ सालको स्थानीय निर्वाचनमा एकीकृत समाजवादीको तर्फबाट मुसिकोट नगरपालिकामा उपप्रमुख पदमा उम्मेदवार बनेका थिए । उपप्रमुखमा एमालेले ७ हजार १४ मत ल्याउँदा महतले ६ हजार ३२३ मत पाएका थिए ।

गुल्मी–२ मा महतसँगै एमालेका गोकर्ण बिष्ट, कांग्रेसका भुवनप्रसाद श्रेष्ठ र राष्ट्रिय स्वतन्त्र पार्टीका गोविन्द पन्थी लगायतले उम्मेदवारी दिएका छन् ।

गत निर्वाचनमा समानुपातिकमा एमालेले २५ हजार १३०, कांग्रेसले १८ हजार ४५१, माओवादी केन्द्रले पाँच हजार ४३७, रास्वपाले ४ हजार २५६ र एकीकृत समाजवादीले १ हजार ६०३ मत पाएको थियो । महतले माओवादी केन्द्र र एकीकृत समाजवादी एकीकरण भएको नेपाली कम्युनिष्ट पार्टीबाट उम्मेदवारी दिएका हुन् ।