लगातार चौथो जितको खोजीमा

यसअघिका तीन वटा संसदीय निर्वाचन लगातार जितिसकेका तेजुलाल चौधरी चौथो पटक चुनाव जित्ने रणनीति सहित यो चुनावमा पनि प्रतिस्पर्धा छन् ।

०००

सप्तरीको खडक नगरपालिकाको भदियामा २०१९ सालमा जन्मेका हुन् तेजुलाल चौधरी । त्रिभुवन विश्वविद्यालयबाट एमबीएसम्मको अध्ययन गरेका उनै तेजुलाल चौधरीलाई नेपाली कांग्रेसले सप्तरी क्षेत्र नम्बर-४ बाट २१ फागुनमा हुने प्रतिनिधिसभा सदस्य निर्वाचनका लागि उम्मेदवार बनाएको छ ।

शिक्षा क्षेत्रमा एक 'भिजनरी' र 'समर्पित' संस्थापकको रूपमा चिनिने चौधरीलाई कांग्रेसले चौथो पटक यो क्षेत्रबाट उम्मेदवार बनाएको हो । चौधरीलाई शैक्षिक संस्थामार्फत सयौँलाई रोजगारी र हजारौँ विद्यार्थीको शैक्षिक भविष्य निर्माणमा योगदान पुर्‍याउने व्यक्तित्वको रूपमा पनि चित्रण गर्ने गरिन्छ ।   ।

चौधरीको संसदीय राजनीतिको यात्रा भने २०७० सालदेखि सुरु भएको हो । उनले २०७० सालको दोस्रो संविधानसभा निर्वाचनमा जित निकालेर संविधान लेखनमा समेत महत्त्वपूर्ण जिम्मेवारी निभाएका थिए । त्यसपछि २०७४ र २०७९ सालको निर्वाचनमा पनि जित निकालेर उनले ह्याट्रिक गरेका थिए । यो चुनावमा चौथो जितको खोजीमा छन् चौधरी ।

२०४६ सालको जनआन्दोलनमा सक्रिय सहभागिता, निरंकुश पञ्चायती व्यवस्थाविरुद्ध जनआन्दोलनमा आफ्नै तहबाट सक्रिय भएका थिए । २०५२ सालमा उनले कांग्रेसको क्रियाशील सदस्य लिएका थिए । २०६२/६३ सालको दोस्रो जनआन्दोलनमा नैतिक, आर्थिक र भौतिक रूपमा उनी संलग्न भए । २०६७ सालदेखि भने उनी कांग्रेस महासमिति सदस्य बने ।

२०७० सालदेखि संसदीय राजनीति सुरु भए पनि २०७४ सालमा भने उनी पहिलोपटक युवा तथा खेलकुद राज्यमन्त्री बने । २०८१ सालमा भने उनी युवा तथा खेलकुद मन्त्री बने ।

ललितपुरको कुपन्डोलस्थित नाइटिङ्गेल इन्टरनेसनल सेकेन्डरी स्कुलका संस्थापक अध्यक्ष समेत रहेका उनलाई स्पष्ट वक्ता, सिधा विचार राख्न सक्ने नेताका रूपमा लिने गरिन्छ ।