कांग्रेसको विरासत फर्काउने यत्न

नेपाली कांग्रेसका सहमहामन्त्री योगेन्द्र चौधरीले दाङ–१ बाट उम्मेदवारी दिएका छन् । २०३१ असार ९ गते गढवा–४, खैरीपुरमा जन्मिएका उनी साढे तीन दशकदेखि राजनीतिमा सक्रिय छन् ।

२०४७ सालमा सरस्वती मावि, गोबरडिहाबाट एसएलसी पास गरेपछि शंकरदेव क्याम्पसमा भर्ना भए । २०४८ सालमा नेपाल विद्यार्थी संघ, शंकरदेव इकाइ कमिटीको सह–सचिव बने ।

२०५०–२०६२ सालसम्म थारू कल्याणकारिणी सभाको अध्यक्ष बनेका उनी २०५७ सालमा कमैया मुक्ति आन्दोलन र २०५९ मा कम्लहरी आन्दोलनको अगुवा बने ।

२०६२/६३ को जनआन्दोलनपछि थरुहट राजनीतिमा निकै सक्रिय भए । केही वर्ष थरुहट आन्दोलन र कांग्रेस राजनीतिलाई सँगसँगै अघि बढाए ।

२०६४ को संविधानसभामा संघीय लोकतान्त्रिक राष्ट्रिय मञ्चबाट उम्मेदवारी दिएका थिए ।

२०६९ मा विजय गच्छदार नेतृत्वको मधेशी जनअधिकार फोरम (लोकतान्त्रिक) प्रवेश गरे र २०७० सालमा संविधानसभा सदस्य बने ।

समानुपातिक प्रणालीबाट सभासद बनेका योगेन्द्र फोरम लोकतान्त्रिक संसदीय दलको प्रमुख सचेतक र महामन्त्री बने । फोरम लोकतान्त्रिकले कांग्रेससँग पार्टी एकीकरण गरेपछि योगेन्द्र कांग्रेस केन्द्रीय सदस्य बने । 

१४औं महाधिवेशनमा पुनः केन्द्रीय सदस्य निर्वाचित भए । त्रिचन्द्र क्याम्पसबाट समाजशास्त्रमा स्नातकोत्तर गरेका उनी विशेष महाधिवेशनबाट सह–महामन्त्रीमा चयन भए ।

माओवादी केन्द्र, एकीकृत समाजवादी लगायतसँग गठबन्धन गरेको कांग्रेसको दाङ–१ मा आफ्नो उम्मेदवार थिएन । उसले एकीकृत समाजवादीलाई समर्थन गरेको थियो ।

समानुपातिकतर्फ २०७९ मा एमालेले १७ हजार ९६९, कांग्रेसले १५ हजार ६७, माओवादी केन्द्रले ११ हजार ४५२, राष्ट्रिय स्वतन्त्र पार्टी (रास्वपा) ले ११ हजार ४१०, नागरिक उन्मुक्ति पार्टीले ७ हजार १७९ र एकीकृत समाजवादीले ३ हजार २१८ मत पाएको थियो ।

दाङ–१ मा योगेन्द्रले एमालेका रेवतीरमण शर्मा घिमिरे, नेकपाका मेटमणि चौधरी, रास्वपाका देवराज पाठक, राप्रपाका विनयी बीसी लगायतसँग प्रतिस्पर्धा गर्दैछन् ।