प्रतिनिधिसभामा पुग्ने तेस्रो प्रयास
विपक्षीहरू आफ्नै आन्तरिक किचलो र मत विभाजनमा रुमल्लिएका बेला, शर्माले एमालेको सांगठनिक मतलाई मात्र सुरक्षित राख्न सके भने त्यो बलियो दावेदारी ठहरिनेछ ।
०००
नेकपा (एमाले)को केन्द्रीय लेखा आयोगका सदस्य रेवतीरमण शर्मा घिमिरेको जन्म २०१४ सालमा लमही–६, खैरी देउखुरीमा भएको हो । उनी २०३२ सालमा स्कूले जीवनमै अखिल विद्यार्थी संगठनमा आवद्ध भएका थिए ।
२०३५ सालमा अखिल विभाजनसँगै उनी अखिल छैटौंमा लागे । राजनीति र पढाइलाई सँगै अघि बढाएका शर्माले २०३९ सालमा अर्थशास्त्रमा स्नातकोत्तर गरे ।
२०४४ सालमा जिल्ला कार्यदल सदस्य मनोनीत भए । २०४७ पुस १ गते पार्टी सदस्यता प्राप्त गरे । त्यसपछि देउखुरी क्षेत्रको इलाका इन्चार्जको जिम्मेवारी पाए ।
२०५४ मा नेपालगञ्जमा आयोजित छैटौं महाधिवेशनबाट एमाले फुटेर माले बन्यो । दाङको ठूलो तप्का मालेतिर लागे । शर्मा एमालेमै बसे । २०५४ सालमै जिल्ला सचिवालय सदस्य भए । २०५९ मा शर्मा जिल्ला कमिटी सचिव बने ।
२०६४ सालमा साविक राप्ती अञ्चल कमिटी सदस्य बने । १०औं महाधिवेशनबाट केन्द्रीय लेखा आयोग सदस्य निर्वाचित उनलाई ११औं महाधिवेशनले त्यही जिम्मेवारीमा दोहोर्यायो ।
२०५४ सालमा चौलाही गाउँविकास समितिको अध्यक्ष निर्वाचित भए । पाँच वर्ष गाविस अध्यक्षको जिम्मेवारी पूरा गरेपछि पार्टी संगठनमा फर्किए ।
दाङ–१ बाट २०६४ मा संविधानसभा सदस्यमा उठेका उनी माओवादी केन्द्रका इन्द्रजित थारूसँग पराजित भए । दोस्रो पटक संविधानसभामा पुग्ने प्रयासमा नेपाली कांग्रेसकी पार्वता डिसी चौधरी बाधक बनिन् ।
२०७० को चुनावमा पराजित भएपछि २०७४ मा दाङ १ (२) बाट प्रदेश सभा सदस्यमा उम्मेदवारी दिए । एमाले–माओवादी गठबन्धनबाट उम्मेदवारी दिएका उनले कांग्रेसलाई फराकिलो मतान्तरले पराजित गरे ।
२०७९ मा सत्ता गठबन्धनका उम्मेदवारले जितेको यो क्षेत्रमा समानुपातिकतर्फ एमालेले सबैभन्दा बढी मत पाएको थियो । दोस्रो बढी मत पाएको कांग्रेसको भन्दा एमालेको तीन हजार मत बढी थियो । तेस्रो स्थानको माओवादी र चौथो स्थानको रास्वपाको भन्दा एमालेले साढे ६ हजार मत बढी पाएको थियो ।
कांग्रेसका योगेन्द्र चौधरी, नेकपाका मेटमणि चौधरी, रास्वपाका देवराज पाठक लगायत यो क्षेत्रमा शर्माका प्रतिस्पर्धी छन् ।
Battleground Analysis
अनुकूलता
- २०७९ को निर्वाचनमा यस क्षेत्रमा एमाले समानुपातिकतर्फ सबैभन्दा ठूलो दल बनेको थियो । उनीसँग लामो समय जिल्ला सचिव र इलाका इन्चार्ज भएर काम गरेको संगठित कार्यकर्ताको पङ्क्ति छ।
- शर्मा २०५४ को एमाले विभाजनमा पनि विचलित नभई पार्टीमै टिकेका निष्ठावान् नेता मानिन्छन् । गाविस अध्यक्ष र प्रदेश सभा सदस्य भई यस क्षेत्रको विकासमा प्रत्यक्ष जोडिएकाले उनीसँग स्थानीय मतदाताको राम्रो चिनजान छ।
- यसपटक विपक्षी शक्तिहरू छुट्टाछुट्टै मैदानमा छन् । विपक्षी मत धेरै तिर बाँडिनु र एमालेको 'कोर' मत सुरक्षित रहनु शर्माका लागि जितको प्रमुख आधार बन्न सक्छ।
प्रतिकूलता
- यसअघिका प्रतिनिधि सभा निर्वाचन पराजित भएको इतिहास र २०७४ को जितमा माओवादीको समेत साथ रहेको सन्दर्भमा यसपटक एक्लै लड्दा उही साख फर्काउन चुनौतीपूर्ण हुन सक्छ।
- प्रमुख राजनीतिक दल कांग्रेस र नेकपाका दुवै उम्मेदवार थारू समुदायका हुन् । जातीय सेन्टिमेन्ट र थारू आन्दोलनको पृष्ठभूमि भएका उम्मेदवारले उनलाई ठूलो चुनौती दिन सक्छन् ।
- रास्वपाले अघिल्लो निर्वाचनमै अप्रत्यासित मत बटुलेर एमालेको आधार क्षेत्रमा धक्का दिएको थियो । यसपटक पनि नयाँ पुस्ताका मतदाताको झुकाव नयाँ दलतिर रहनुले एमालेलाई सकस पर्न सक्छ।
चुनावी इतिहास
| निर्वाचन | क्षेत्र | प्रतिस्पर्धी | प्रतिस्पर्धी मत | प्राप्त मत | मतान्तर | नतिजा |
|---|---|---|---|---|---|---|
| संविधानसभा सदस्य निर्वाचन २०६४ | दाङ - १ | इन्द्रजीत थारु (कांग्रेस) | १८०९३ | ४६९२ | १३४०१ | पराजित |
| संविधानसभा सदस्य निर्वाचन २०७० | दाङ - १ | पार्वता डीसी चौधरी (कांग्रेस) | ८७१९ | ७०७५ | १६४४ | पराजित |
| लुम्बिनी प्रदेश सभा निर्वाचन २०७४ | दाङ - १ (१) | जानकीलाल बस्नेत (कांग्रेस) | १२७५३ | १९३५४ | ६६०१ |
|
रेवतीरमण शर्मा घिमिरेको प्रोफाइल पढेर तपाईंलाई कस्तो लाग्यो ?
