रोल्पापछि बाँकेबाट प्रतिस्पर्धा

रोल्पाको गंगादेव–७, राकमा जन्मिएका ५५ वर्षीय अमरसिंह पुनले नेपाली कांग्रेसको सदस्य भएर २०४८ सालदेखि राजनीति शुरु गरे । रोल्पा–२ को कांग्रेस क्षेत्रीय सचिव भएका बेलामा २०५१ र २०५४ को निर्वाचनमा पार्टीका उम्मेदवारलाई जिताउन महत्वपूर्ण भूमिका खेले । २०५४ को स्थानीय निकाय निर्वाचनमा राक गाविस वडा नं. ८ को वडा सदस्यमा निर्वाचित भए ।

माओवादीले शुरु गरेको सशस्त्र  विद्रोहका वेला कांग्रेस कार्यकर्तामाथि आत्रमण बढ्न थालेपछि २०५६ सालमा पुन रोल्पाबाट नेपालगन्ज झरे । नेपालगन्जमा आएर ट्राभल एजेन्सी र निर्माण व्यवसाय शुरु गरे ।

प्लस टुसम्म अध्ययन गरेका पुनले नेपालगन्जमै बसेर कांग्रेस राजनीतिलाई निरन्तरता दिए । २०६२ मा कांग्रेस रोल्पाको ११औं अधिवेशनबाट जिल्ला कोषाध्यक्षमा निर्वाचित भए । २०६२/६३ को जनआन्दोलनमा नेपालगन्जमै सक्रिय भए ।

२०६९ को ११औं राष्ट्रिय महाधिवेशनदेखि महासमिति सदस्य निर्वाचित हुँदै आएका छन् । २०७० को दोस्रो संविधानसभा निर्वाचनमा समानुपातिक तर्फबाट सभासद निर्वाचित भए । संसद्को सार्वजनिक सुनुवाइ विशेष समिति र विकास समितिको सदस्य भएर काम गरे ।

कांग्रेसका तत्कालीन सभापति निकट मानिने उनी २०७२ मा १३औं अधिवेशनबाट रोल्पाको जिल्ला सभापति निर्वाचित भए । २०७४ मा शेरबहादुर देउवा नेतृत्वको सरकारमा सिंचाइ राज्यमन्त्री भएका थिए ।

२०७४ को प्रतिनिधिसभा चुनावमा रोल्पाबाट उठेका उनी माओवादी केन्द्रका वर्षमान पुनसँग पराजित भए । त्यतिबेला माओवादी र एमाले बीच गठबन्धन थियो ।

पाँच वर्षपछि गठबन्धन उल्टियो । २०७९ मा कांग्रेस र माओवादीले गठबन्धन गरे । प्रतिनिधिसभामा वर्षमान दोहोरिए । प्रदेश सभातर्फ रोल्पा १ (२) बाट अमरसिंहले उम्मेदवारी दिए । माओवादीले दीपेन्द्रकुमार पुनलाई बागी उठाएर जितायो ।
२०७९ को मंसिरमा सम्पन्न अधिवेशनबाट लुम्बिनी प्रदेश सभापतिमा निर्वाचित भए । २०८२ पुसमा सम्पन्न विशेष महाधिवेशनमा व्यवस्थापन समितिको सदस्यको रूपमा खटिए । उनी सभापति गगन थापा निकट मानिन्छन् ।

अमरसिंहले उम्मेदवारी दिएको बाँके–३ मा २०७९ मा कांग्रेसका निवर्तमान सहमहामन्त्री किशोरसिंह राठौर २९ हजार ९७ मत ल्याएर विजयी भएका थिए । उनका निकटतम प्रतिद्वन्द्वी एमालेका किस्मतकुमार कक्षपतिले २४ हजार ३०५, राष्ट्रिय स्वतन्त्र पार्टीका देवेन्द्रनाथ शुक्ला ७ हजार ४६७, जसपा नेपालका नोयन्द्र धितालले ४ हजार २९१ मत पाएका थिए ।

१ लाख १३ हजार ३२२ कुल मतदाता रहेको यो क्षेत्रमा दलहरू गठबन्धन विनै निर्वाचनमा होमिएका छन् ।

यो क्षेत्रमा समानुपातिकतर्फ कांग्रेसले १९ हजार ८६७, एमालेले १८ हजार ३४९, नागरिक उन्मुक्ति पार्टीले ६ हजार ७६५, रास्वपाले ६ हजार ४७३, माओवादीले ५ हजार ९०१, जसपा नेपालले ४ हजार ४४६ र राष्ट्रिय प्रजातन्त्र पार्टीले २ हजार ७९६ मत पाएको थियो ।