विपक्षमा गठबन्धन नभएको लाभ लिने दाउ

महेश बस्नेत संयोजकत्वको युथ फोर्समा केन्द्रीय सदस्य थिए, सुमन मल्ल । बाँकेको खजुरा–१, राधापुरका स्थानीय बासिन्दा उनको जन्म २०४० साउन ९ मा भएको हो ।

‘प्लस टु’ अध्ययन गरेका मल्ल मार्सल आर्ट खेलाडी तथा पर्यटन व्यवसायी हुन् । उनी २०७४ सालमा खजुरा गाउँपालिका वडा नं १ को वडाअध्यक्ष निर्वाचित भएका थिए । वडाध्यक्षले पाउने पारिश्रमिक जेहेन्दार विद्यार्थीको पढाइ तथा विपन्न बिरामीको औषधि उपचारमा खर्च गरे ।

२०७९ सालको निर्वाचनमा खजुरा गाउँपालिकाको अध्यक्षमा उम्मेदवारी दिए । कांग्रेस माओवादी गठबन्धनका उम्मेदवार डम्बर बिकेले पराजित गरे ।

यो क्षेत्रमा त्यतिबेला कांग्रेसका किशोरसिंह राठौरले एमालेका उम्मेदवारलाई ४ हजार ७९२ मतले हराएका थिए । कांग्रेस उम्मेदवारले माओवादी, एकीकृत समाजवादी र राष्ट्रिय जनमोर्चाको साथ पाएको थियो । समानुपातिकमा माओवादीले ५ हजार ९०१, एकीकृत समाजवादीले ९१९ र जनमोर्चाले ११४ भोट ल्याएको थियो ।

कांग्रेसले कसैसँग गठबन्धन नगर्नु मल्लका लागि अनुकूलता हो । कांग्रेसले रोल्पा घर भएका लुम्बिनी प्रदेश अध्यक्ष अमरसिंह पुन र रास्वपाले दैलेखका खगेन्द्र सुनारलाई मैदानमा उतारेको छ । रास्वपाका देवेन्द्र नाथ शुक्ला ७ हजार ४६७ मतका साथ तेस्रो र जसपा नेपालका नोयन्द्र धिताल ४ हजार २९१ ल्याएर चौथो भएका थिए ।

मल्ल तीन वर्ष पहिले पालिका अध्यक्षमा भोगेको पराजयको पीडा फागुन २१ मा संसदीय निर्वाचन जितेर भुल्न चाहन्छन् ।