एमालेको लोकप्रियता फर्काउने दायित्व युवा काँधमा

०७९ र २०८० का दुई चुनावमा व्यहोरेको हारलाई जितमा बदल्ने लक्ष्यका साथ अस्‍मिन घिमिरे चुनावी मैदानमा उत्रिएका हुन्। 

०००

नेकपा (एमाले)ले चितवन–२ मा पछिल्लो चारमध्ये दुईवटा निर्वाचनमा पराजय भोग्यो । २०७० र २०७४ मा निर्वाचित एमाले केन्द्रीय सदस्य कृष्णभक्त पोखरेलले २०७९ को चुनाव हारे ।

२०८० को उपनिर्वाचनमा उठेका रामप्रसाद न्यौपानेले पनि जित निकाल्न सकेनन् । यसपटक एमालेले चितवन–२ मा युवा नेता अस्मिन घिमिरेलाई अघि सारेको छ ।

२०४४ सालमा गोरखाको सिरानचोकमा जन्मिएका घिमिरे भरतपुर महानगरपालिका वडा नं. १२ मा स्थायी बसोवास गर्छन् । २०६० सालदेखि अनेरास्ववियूमा आवद्ध उनी २०६५ मा अनेरास्ववियू सप्तगण्डकी बहुमुखी क्याम्पसको इकाइ अध्यक्ष बने ।

अञ्चल कमिटी हुँदै अनेरास्ववियूको सचिवालय सदस्य तथा विदेश विभागको सचिव बने । युवा संघको केन्द्रीय प्रचार विभागको सदस्य बनेर केन्द्रीय सचिवालय सदस्यसम्म बनेका घिमिरे अहिले एमाले बागमती प्रदेश कमिटी सदस्य तथा जनसांस्कृतिक महासंघ बागमती प्रदेशको इन्चार्ज छन् ।

२०७१ मा युवा परिषद् चितवनको अध्यक्ष बनेका थिए । युवाहरूलाई समस्या पर्दा गएर सहयोग गर्ने घिमिरे गीत गाउँदै मतदातासँग मत मागिरहेको भेटिन्छन् ।

२०७९ को निर्वाचनमा समानुपातिकमा रास्वपाले ३५ हजार ९४५ पाउँदा एमालेको १६ हजार ७८४ मत थियो । एमालेका उम्मेदवारहरूले प्रत्यक्षतर्फ २०७९ मा कृष्णभक्त पोखरेलले १४ हजार ६५२ र २०८० मा रामप्रसाद न्यौपानेले १० हजार ९३६ मत पाएका थिए ।