चुनावी मन्त्रीबाट राजीनामा दिएर संसदीय चुनावमा

सिरहा निर्वाचन क्षेत्र नम्बर १ बाट राष्ट्रिय स्वतन्त्र पार्टी (रास्वपा) का प्रतिनिधिसभा सदस्य उम्मेदवार बब्लु गुप्ता लहानका स्थायी बासिन्दा हुन्।

स्नातकसम्मको अध्ययन पूरा गरेका २८ वर्षीय गुप्ताले विद्यालय तहको शिक्षा काठमाडौंमा हासिल गरेका थिए।

विद्यार्थी जीवनदेखि नै सामाजिक सेवामा सक्रिय रहेका उनी गाउँबाट वैदेशिक रोजगारीमा जाने क्रममा ठगीमा परेकाहरूलाई सहयोग गर्ने, विपन्न विद्यार्थीको शिक्षामा सहयोग गर्ने तथा गाउँबाट उपचारका लागि आएका बिरामीलाई विभिन्न किसिमका सहायता प्रदान गर्ने कार्यमा संलग्न रहँदै आएका छन्।

विश्वव्यापी कोभिड–१९ महामारीका बेला राजधानीमा मजदुरी गरिरहेका तथा भोकमरीको जोखिममा परेका विपन्न वर्गका लागि निःशुल्क खाना अभियान सञ्चालन गरेर उनी व्यापक रूपमा चर्चामा आएका थिए।

सामाजिक अभियान र जेन्जी आन्दोलनमा सक्रिय भूमिकाका कारण उनी जेन्जी समूहबाट युवा तथा खेलकुद मन्त्री बनेका थिए। छोटो समय मन्त्रीका रूपमा काम गरे पनि उनले जिल्लामा सकारात्मक छाप छोड्न सफल भए।

उनको पहलमा लामो समयदेखि अलपत्र अवस्थामा रहेको लहानस्थित रामकुमार सारडा–उमाप्रसाद मुरारका स्मारक अस्पतालको जग्गा नामसारी प्रक्रिया अघि बढ्यो।

साथै, खेल मैदान स्तरोन्नतिमा सक्रियता देखाए र करिब १४ वर्षदेखि अलपत्र रहेको सिरहा–धनुषा जोड्ने कमला पुल पुनर्निर्माणका लागि पहल गरेकाले उनी प्रशंसित भएका थिए।

तर, मन्त्री पदबाट राजीनामा दिएर निर्वाचनमा होमिएपछि भने उनको सामाजिक भावना र आफूलाई 'स्वतन्त्र' र सेवामुखी नेता भनेर बनाएको छविमा केही धक्का पुगेको भन्दै आलोचना पनि सुरु भएको छ।

जेनजी आन्दोलनपछि बनेको अन्तरिम सरकारको खेलकुद मन्त्री बनेका उनी राजीनामा दिएर संसदीय चुनावमा होमिएका हुन् ।