समाजसेवा हुँदै राजनीतिमा

विद्यार्थीकालदेखि नै नेपाली काँग्रेसको राजनीति र समाजसेवामा सक्रिय रहँदै आएका रामसुन्दर चौधरी २०८२ फागुन २१ गते हुने प्रतिनिधिसभा सदस्य निर्वाचनमा उम्मेदवार बनेका छन्। निरन्तर संघर्ष, संगठन निर्माण र सामाजिक सेवामा समर्पित उनको राजनीतिक यात्रा चार दशकभन्दा लामो छ।

२०१९ साल असार १ गते सिरहा जिल्लाको साविक सितापुर गाविस, हाल लक्ष्मीपुर पतारी गाउँपालिका–६ सितापुरमा जन्मिएका चौधरीले स्नातकसम्मको औपचारिक शिक्षा हासिल गरेका छन्। विद्यार्थी जीवनमै राजनीति रोजेका उनले २०३६ सालमा जनकपुरस्थित आर.आर. क्याम्पसमा अध्ययन गर्दै नेपाल विद्यार्थी संघमार्फत राजनीतिक यात्रा सुरु गरेका हुन्।

त्यही वर्ष सम्पन्न जनमत संग्रहमा बहुदलीय व्यवस्थाको पक्षमा सक्रिय भूमिका निर्वाह गरेको उनी स्मरण गर्छन्। 'स्वर्गीय नेता प्रदीप गिरिको नेतृत्वमा हामी बहुदलको पक्षमा लाग्यौं, र देशभरमै सिरहाले सबैभन्दा बढी मत बहुदललाई दियो,' उनी भन्छन्।

२०४६ सालको जनआन्दोलनपछि निरन्तर रूपमा राजनीतिमा सक्रिय रहेका चौधरीले पार्टी संगठन निर्माणमा महत्वपूर्ण योगदान दिएका छन्। उनले २०४७ सालमा नगरसभापतिको जिम्मेवारी सम्हालेका थिए। त्यसपछि जिल्ला कार्यसमितिमा विभिन्न पदमा रहँदै दुई कार्यकाल जिल्ला उप–सभापतिको भूमिका पनि निर्वाह गरे।

संगठनात्मक भूमिकासँगै उनले विभिन्न सामाजिक र शैक्षिक संस्थामा समेत नेतृत्व गरेका छन्। २०४९ सालमा जिल्ला खेलकुद विकास समितिको अध्यक्ष बनेका चौधरी २०७४ देखि २०८० सालसम्म लहानस्थित जेएस मुरारका क्याम्पसका अध्यक्षका रूपमा कार्यरत रहे।

राजनीतिक प्रतिस्पर्धामा पनि उनी सक्रिय रहँदै आएका छन्। २०५४ सालमा लहान नगर अध्यक्ष पदमा उम्मेदवारी दिएका उनी नेकपा एमालेका उम्मेदवारसँग पराजित भएका थिए। त्यस्तै, २०७८ सालमा नेपाली काँग्रेसको जिल्ला सभापतिका लागि चुनाव लडे पनि सफल हुन सकेनन्।

पार्टीभित्र उपसभापतिसम्मको जिम्मेवारी सम्हालिसकेका चौधरी यसपटक प्रतिनिधिसभा सदस्यका लागि पहिलो पटक उम्मेदवार बनेका हुन्। लामो राजनीतिक अनुभव, संगठनप्रतिको निष्ठा र सामाजिक सेवामा निरन्तर संलग्नताका कारण उनी जिल्लामा परिचित र विश्वासिला नेताका रूपमा चिनिन्छन्।

उनले आगामी निर्वाचनमा जनताको सेवा, विकास र सुशासनलाई मुख्य एजेन्डा बनाएर अघि बढ्ने प्रतिबद्धता व्यक्त गर्दै आएका छन् ।