स्थापित व्यवसायीको संसद् छिर्ने लक्ष्य

ऊर्जा क्षेत्रको विकास, स्थानीय रोजगारी सिर्जना र दिगो आर्थिक वृद्धिमा उनको संलग्नता उल्लेखनीय मानिन्छ ।

०००

भरतप्रसाद पराजुली राष्ट्रिय स्वतन्त्र पार्टी (रास्वपा) बाट  सिन्धुपाल्चोक क्षेत्र नम्बर १ मा प्रतिनिधिसभा उम्मेदवार हुन् । उनी सिन्धुपाल्चोकको बलेफी गाउँपालिका–६ का स्थायी बासिन्दा हुन् ।

१९ भदौ २०२५ मा जन्मिएका पराजुलीले स्नातकोत्तर तहसम्म अध्ययन पूरा गरेका छन् । उनी शिक्षित र स्थापित व्यवसायीका रूपमा परिचित छन् ।

राजनीतिक रूपमा नेकपा एमाले पृष्ठभूमिबाट आएका भए पनि उनी हाल राष्ट्रिय स्वतन्त्र पार्टीमार्फत सक्रिय राजनीतिमा प्रवेश गरेका हुन् । संसदीय अनुभव नभए पनि निजी क्षेत्रको लामो अनुभव र व्यवस्थापन क्षमताले उनलाई फरक पहिचान दिएको छ ।

पराजुली हाल जुगल गाउँपालिकामा निर्माणाधीन ४५ मेगावाट क्षमताको ब्रह्मायणी जलविद्युत् आयोजनाका अध्यक्षसमेत हुन् ।

ऊर्जा क्षेत्रको विकास, स्थानीय रोजगारी सिर्जना र दिगो आर्थिक वृद्धिमा उनको संलग्नता उल्लेखनीय मानिन्छ ।

चुनावी इतिहास नभएका उनी नयाँ अनुहारका रूपमा विकास, सुशासन र परिणाममुखी राजनीतिलाई प्राथमिकतामा राख्दै सिन्धुपाल्चोक क्षेत्र नम्बर १ बाट प्रतिनिधिसभा निर्वाचनमा प्रतिस्पर्धा गर्दैछन् ।

२०७९ सालको प्रतिनिधिसभा निर्वाचनमा यो क्षेत्रबाट तत्कालीन माओवादी केन्द्रका उम्मेदवार माधव सापकोटा ३० हजार ४०८ मत ल्याएर निर्वाचित भएका थिए । उनलाई नेपाली कांग्रेसले सघाएको थियो ।

दोस्रो स्थानमा हासिल गरेका नेकपा एमालेका सरेश नेपालले २७ हजार ६६ प्राप्त गर्दा रास्वपाका दिनेश श्रेष्ठ ३ हजार ५०३ मतमा सीमित भएका थिए ।