सुशासनको मुद्दा बोकेर मैदानमा

कांग्रेस उम्मेदवार लामाले स्थानीय विकास, पूर्वाधार निर्माण, सुशासन र जनताको जीवनस्तर सुधारलाई आफ्नो प्रमुख राजनीतिक एजेन्डा बनाएर अघि बढिरहेका छन् ।

०००

नेपाली कांग्रेसले सिन्धुपाल्चोक क्षेत्र नम्बर १ मा जंगबहादुर लामालाई आसन्न प्रतिनिधिसभा सदस्यको उम्मेदवार बनाएको छ ।  २७ असोज २०३४ मा सिन्धुपाल्चोकको जुगल गाउँपालिका-७ मा जन्मिएका लामा सरल, इमानदार र जनमुखी नेताका रूपमा परिचित छन् ।

निर्माण व्यवसायी पृष्ठभूमिबाट राजनीतिमा आएका लामा हाल कांग्रेसको सिन्धुपाल्चोक जिल्ला सभापति हुन् । उनी २०७८ फागुन ३० गतेदेखि नेपाली कांग्रेस सिन्धुपाल्चोकको जिल्ला सभापतिमा चयन भएका थिए ।

संगठन निर्माण, कार्यकर्ता परिचालन र जिल्लामा पार्टीलाई सशक्त बनाउने काममा उनको उल्लेखनीय भूमिका रहेको छ । लामा स्थानीय विकास, पूर्वाधार निर्माण, सुशासन र जनताको जीवनस्तर सुधारलाई आफ्नो प्रमुख राजनीतिक एजेन्डा मान्दै अघि बढिरहेका छन् ।

संसदीय अनुभव नभए पनि जनताको नजिक रहेर पार्टीको काम गर्दै आएकोले उनलाई जिल्लाबासीले एक आशावादी नेताको रूपमा लिँदै आएका छन् ।

२०७९ सालको प्रतिनिधिसभा निर्वाचनमा यो क्षेत्रबाट तत्कालीन माओवादी केन्द्रका उम्मेदवार माधव सापकोटा ३० हजार ४०८ मत ल्याएर निर्वाचित भएका थिए । उनलाई नेपाली कांग्रेसले सघाएको थियो ।

दोस्रो स्थानमा हासिल गरेका नेकपा एमालेका सरेश नेपालले २७ हजार ६६ प्राप्त गर्दा रास्वपाका दिनेश श्रेष्ठ ३ हजार ५०३ मतमा सीमित भएका थिए ।

कांग्रेस नेता मोहनबहादुर बस्नेतले लामो समयदेखि यही क्षेत्रबाट चुनाव लड्दै र जित्दै आए पनि गत निर्वाचनमा भने गठबन्धनका कारण उनी क्षेत्र नम्बर २ मा गएका थिए ।