अघिल्लो निर्वाचनकै प्रतिस्पर्धीसँग भिड्दै सरेश नेपाल

नेपालले २०७४ सालको संसदीय निर्वाचनबाट बागमती प्रदेशसभा सदस्य निर्वाचित भई बागमती प्रदेश सरकारको वन तथा वातावरण मन्त्रीको जिम्मेवारी सम्हालेका थिए ।

०००

नेकपा एमालेले सिन्धुपाल्चोक क्षेत्र नम्बर १ बाट सरेश नेपाललाई प्रतिनिधिसभाको उम्मेदवार बनाएको छ । उनी सिन्धुपाल्चोकका अनुभवी कम्युनिस्ट नेता हुन् ।

१ माघ २०१७ मा सिन्धुपाल्चोकको सुनकोशी गाउँपालिका–७ मा जन्मिएका नेपालले स्नातक तहसम्मको औपचारिक शिक्षा हासिल गरेका छन् ।

२०३५ सालदेखि निरन्तर राजनीतिमा सक्रिय रहँदै आएका उनले २०४० सालमा पञ्चायती शासन विरुद्धको पिस्कर विद्रोहमा सहभागिता जनाएका थिए । उक्त विद्रोहपछि भूमिगत जीवन बिताएका नेपालले २०४० देखि २०४३ सालसम्म जेल जीवनसमेत भोगेका थिए ।

गुठी जग्गापीडितको पक्षमा निरन्तर वकालत गर्दै आएका नेपाल खरो, तार्किक र तथ्यमा आधारित विचार राख्ने नेताका रूपमा परिचित छन् ।

नेपालले २०७४ सालको संसदीय निर्वाचनबाट बागमती प्रदेशसभा सदस्य निर्वाचित भई बागमती प्रदेश सरकारको वन तथा वातावरण मन्त्रीको जिम्मेवारी सम्हालेका थिए ।

यसअघि तत्कालीन जिल्ला विकास समितिको सभापति तथा नेकपा एमालेको लेखा समिति सदस्य भएर काम गरेको अनुभव पनि उनीसँग छ ।

जिल्लाका निकै प्रभावशाली नेताका रूपमा चिनिने नेपाललाई यदाकदा दल भित्र गुटगत राजनीति गरेको आरोप लाग्ने गरेको पाइन्छ ।

२०७९ को प्रतिनिधिसभा निर्वाचनमा सिन्धुपाल्चोक-१ बाट २७ हजार १८ मत प्राप्त गरेका उनी माओवादी केन्द्रका माधव सापकोटासँग पराजित भएका थिए । यस पटक पनि उनको प्रतिस्पर्धा नेकपाका उनै सापकोटासँग हुँदैछ ।