डोल्पाको मैदानमा इन्जिनियर ऐडी

राजनीतिक पृष्ठभूमि नेकपा एमालेसँग नजिक भए पनि उनी रास्वपाबाट प्रतिनिधिसभा निर्वाचनमा प्रतिस्पर्धा गर्दैछन् ।

०००

राष्ट्रिय स्वतन्त्र पार्टी (रास्वपा) ले ४४ वर्षीय देवसिंह ऐडीलाई डोल्पाबाट प्रतिनिधिसभाको टिकट दिएको छ । १८ वैशाख २०४८ मा डोल्पाको जगदुल्ला गाउँपालिका झ्याकोटमा जन्मिएका ऐडी राजनीतिमा आउनुअघि इन्जिनियर थिए । 

उनले २०७९ सालमा पोखरा विश्वविद्यालयबाट इलेक्ट्रोनिक्स एन्ड कम्युनिकेसनमा इन्जिनियरिङ सकेका थिए।  पारिवारिक पृष्ठभूमि नेकपा एमालेसँग निकट भएकाले उनी पनि २०६७/६८ तिर एमालेप्रति नै आस्थावान थिए ।

पछिल्लो समयमा भने उनी राजनीतिप्रति खासै चासो राख्दैनथे । राजनीतिमा आउने चाहना नहुँदा नहुँदै पनि देश र डोल्पा जिल्लाको खराब अवस्थाका कारण आफू राजनीतिमा आउन बाध्य भएको ऐडी बताउँछन् । 

२०७९ सालमा राष्ट्रिय स्वतन्त्र पार्टीको सदस्यता लिएका उनी पार्टीको प्रारम्भिक समानुपातिक निर्वाचनमा सामेल भएका थिए । उनले प्रारम्भिक समानुपातिक निर्वाचनमा १ हजार ६०६ मत प्राप्त गरेका थिए । 

२०७९ सालको प्रतिनिधिसभा निर्वाचनमा डोल्पाबाट प्रत्यक्षतर्फ उम्मेदवार नै नपाएको रास्वपाले समानुपातिकतर्फ भने ६०० को हारहारी मत पाएको थियो । 

जिल्लामा राम्रोसँग संगठन विस्तार नै नभएको रास्वपाका उम्मेदवार ऐडीले परिवर्तनको लागि आफूलाई मतदान गर्नुपर्ने बताएका छन् ।

पछिल्लो समय देशभर रास्वपाको लहर आएकोले यो पटकको निर्वाचनमा डोल्पाका जनताले पनि रास्वपालाई मतदान गरेर संसद्मा पठाउने उनको दाबी छ ।

प्रतिनिधिसभा निर्वाचन २०७९ मा डोल्पाबाट नेपाल कम्युनिस्ट पार्टी (तत्कालीन माओवादी केन्द्रका धनबहादुर बुढा निर्वाचित भएका थिए । बुढाले ११ हजार २९२ मत ल्याउँदा नेकपा एमालेका गणेशबहादुर शाहीले ५ हजार ५०५ मत ल्याएर दोस्रो भएका थिए ।