गोलाप्रथामा सभापति हारे, अहिले उम्मेदवार बने

धनेन्द्र कार्की रास्वपाको सिन्धुली सभापति पदमा प्रतिस्पर्धी गर्दा बराबर मत आएपछि गोलाप्रथाबाट पराजित भएका थिए । अहिले उनै कार्कीलाई रास्वपाले सिन्धुली-१ को उम्मेदवार बनाएको छ ।

०००

धनेन्द्र कार्की सिन्धुली क्षेत्र नम्बर १ मा राष्ट्रिय स्वतन्त्र पार्टीको तर्फबाट प्रतिनिधिसभा उम्मेदवार छन् ।

२०४३ चैत्र २२ गते सिन्धुलीमा जन्मिएका कार्की टीकाबहादुर कार्की र खेमकुमारी कार्कीका माइला छोरा हुन् ।

कार्कीको प्रारम्भिक तथा माध्यमिक शिक्षा सिन्धुलीको लम्पन्टार माध्यमिक विद्यालयबाट पूरा भएको थियो । उच्च शिक्षातर्फ उनले मदन भण्डारी मेमोरियल कलेजबाट बीएडसम्म अध्ययन गरेका छन् ।

सानै उमेरदेखि व्यवसायमा संलग्न रहँदै आएका कार्की यातायात क्षेत्रसँगसमेत जोडिएका छन् ।

आफूलाई समाजसेवीको रूपमा प्रस्तुत गर्ने कार्की गाउँका विभिन्न क्लब, सामाजिक संस्था तथा सामुदायिक कार्यहरूलाई आर्थिक तथा अन्य सहयोग प्रदान गरिरहेको दाबी गर्छन् । यही कारण आफू राजनीतिमा होमिएको र प्रतिनिधिसभाको उम्मेदवार बनेको उनको भनाइ छ ।

राजनीतिक यात्राको हिसाबले हेर्दा कार्कीले २०७४ सालको स्थानीय तह निर्वाचनमा वडाध्यक्ष पदमा प्रतिस्पर्धा गरेका थिए ।

त्यसपछि रास्वपा गठन भएदेखि नै यस पार्टीमा आबद्ध भए । कार्कीले पार्टीको क्षेत्रीय सभापतिको भूमिका पनि निर्वाह गरेका थिए भने पालिका तहको सांगठनिक विस्तारमा पनि भूमिका खेले ।

त्यसपछि पार्टी जिल्ला सभापति पदमा प्रतिस्पर्धा गरेका उनले प्रतिद्वन्द्वी बराबर मत ल्याए । र, गोलाप्रथाबाट पराजित भए ।

कार्कीले बागमती प्रदेशको श्रम तथा उपभोक्ता हित विभाग प्रमुखको जिम्मेवारी पनि सम्हालेका थिए । उनले खेलकुद, कृषि, सडक पूर्वाधार, स्वरोजगार, शिक्षा र स्वास्थ्य क्षेत्रलाई प्राथमिकता दिने बताएका छन् । तर, पुराना ठूला दल नै उनका लागि चुनौती छ ।