नि:शुल्क शिक्षा र स्वास्थ्यको मुद्दा बोकेर मैदानमा

शिक्षा र स्वास्थ्यलाई पूर्ण निःशुल्क बनाउन कानुनी पहल गर्ने बताउँदै मतदाताको घरदैलोमा पुगिरहेका सम्बाहाङफेले भूमिहीनका समस्याको दीर्घकालीन समाधान, पेट्रोलियम उत्खनन, नदी नियन्त्रणलगायत विषयलाई चुनावी मुद्दा बनाएका छन् ।

०००

डा. देउमान सम्बाहाङफे मोरङ क्षेत्र नम्बर ३ मा नेपाल कम्युनिस्ट पार्टी (नेकपा) का तर्फबाट चुनावी प्रतिस्पर्धामा छन् ।  उनी पाँचथरको कुम्मायक गाउँपालिका–४ रानीगाउँमा २०२४ सालमा जन्मिएका हुन् । सम्बाहाङफे तत्कालीन निरंकुश पञ्चायती व्यवस्थाविरुद्ध कम्युनिस्ट आन्दोलनमा होमिएका थिए ।

बौद्धिक नेताका रूपमा परिचित उनले त्रिभुवन विश्वविद्यालय, कीर्तिपुरबाट नेपालको संविधानसभाका विषयमा पीएचडी गरेका छन् ।

२३ वर्षभन्दा बढी समय अधिवक्ताका रूपमा काम गरेका सम्बाहाङफे पथरीशनिश्चरे–१ स्थित सुनाखरी माध्यमिक विद्यालयका संस्थापक शिक्षकसमेत हुन् ।

२०३६ को जनमत संग्रहसँगै उनले अखिलबाट विद्यार्थी राजनीति सुरु गरेका उनी लेखकसमेत हुन् ।

नेकपा उम्मेदवार सम्बाहाङफे शिक्षा र स्वास्थ्यलाई पूर्ण निःशुल्क बनाउन कानुनी पहल गर्ने बताउँदै मतदाताको घरदैलोमा पुगिरहेका छन् ।

उनले भूमिहीन, सुकुम्बासी र दोहोरो स्वामित्वका समस्याको दीर्घकालीन समाधानसम्म गर्ने पेट्रोलियम उत्खनन, नदी नियन्त्रण लगायत विषयलाई आफ्ना चुनावी मुद्दा बनाएका छन् ।

२०७९ को प्रतिनिधिसभा निर्वाचनमा मोरङ-३ बाट नेपाली कांग्रेसका सुनिल शर्मा भारी मतले निर्वाचित भएका थिए । शर्मा ४८ हजार ६३१ मत ल्याएर निर्वाचित हुँदा उनका मुख्य प्रतिस्पर्धी नेकपा एमालेका भानुभक्त ढकालले २५ हजार ८९५ मत प्राप्त गरेका थिए ।

कांग्रेससँग गठबन्धनका कारण अघिल्लो चुनावमा नेकपा (तत्कालीन माओवादी केन्द्र) ले उम्मेदवारी दिएको थिएन । यस पटक कुनै दलसँग गठबन्धन नभएका कारण नेकपा उम्मेदवार जित निकाल्न निकै कसरत गर्नुपर्ने देखिन्छ ।