प्रश्न गरेर खारिएका गणेश चुनावी मैदानमा

सभापति रवि लामिछानेलाई बारम्बार प्रश्न गर्दै उनले रास्वपा भित्र विद्रोही नेताको पहिचान बनाएका छन् । 

०००

राष्ट्रिय स्वतन्त्र पार्टी (रास्वपा) ले मोरङ क्षेत्र नम्बर ३ बाट गणेश कार्कीलाई प्रतिनिधिसभाको उम्मेदवार बनाएको छ । उनी पार्टी भित्र प्रश्न गर्ने नेताको रूपमा परिचित छन् ।

सभापति रवि लामिछानेलाई बारम्बार प्रश्न गर्दै आएका उनले रास्वपा भित्र विद्रोही नेताको पहिचानसमेत बनाएका छन् ।  सभापतिमाथि प्रश्न गरेर उनले सधैं नेतृत्वलाई जवाफदेही बनाउने प्रयास गरे ।

चलचित्र लेखकसमेत रहेका उनी मोरङको पथरीशनिश्चरेका बासिन्दा हुन् । पछिल्लो समय भने उनी काठमाडौंमा बसोबास गर्दै आएका छन् । 

गत स्थानीय निर्वाचनमा बालेन शाह काठमाडौं महानगरपालिकाको उम्मेदवार बन्दा कार्कीले प्रचारप्रसार अभियानमा नेतृत्वदायी भूमिका खेलेका थिए । तर बालेन निर्वाचित भएपछि उनी लाभको पदमा भने बसेनन् ।

सुमना श्रेष्ठ शिक्षा मन्त्री हुँदा कार्कीले सरकारको नीति निर्माणसमा सहयोगी भूमिका निर्वाह गरे । सुमनाले रास्वपा परित्याग गर्दा ताका उनी पनि पार्टी भित्र प्रश्न गरेर चर्चामा आएका थिए । 

रास्वपा वरिष्ठ नेता बालेनसँग निकट रहेका ४० वर्षीय कार्कीले रास्वपा भित्र वैचारिक नेताको छवि बनाएका छन् ।

रास्वपाको संस्थापक केन्द्रीय सदस्य रहेका उनी २०७९ सालको निर्वाचनमा समानुपातिक सूचीमा थिए । यो पटक भने आफ्नो घर फर्किएर प्रत्यक्षतर्फ चुनावी मैदानमा उत्रिएका छन् ।

मोरङ-३ मा कार्कीको प्रतिस्पर्धा नेपाली कांग्रेसका सुनिल शर्मा, नेपाल कम्युनिस्ट पार्टीका देउमान सम्वाहाङफे, नेकपा एमालेका इरनकुमार राई लगायतसँग हुँदैछ ।

२०७९ को प्रतिनिधिसभा निर्वाचनमा मोरङ-३ बाट नेपाली कांग्रेसका सुनिल शर्मा भारी मतले निर्वाचित भएका थिए । शर्मा ४८ हजार ६३१ मत ल्याएर निर्वाचित हुँदा उनका मुख्य प्रतिस्पर्धी नेकपा एमालेका भानुभक्त ढकालले २५ हजार ८९५ मत प्राप्त गरेका थिए ।

त्यतिबेला यो क्षेत्रमा राष्ट्रिय प्रजातन्त्र पार्टीकी उम्मेदवार रेखा थापाले १० हजार ९९८ मत ल्याउँदा रास्वपाका उम्मेदवार विकाश उप्रेती ३ हजार १७२ मतमा सीमित भएका थिए ।