१८ वर्षपछि मतदाताको दैलोमा प्रकाण्ड

झन्डै दुई दशकदेखि निर्वाचन बहिस्कार गर्दै आएका प्रकाण्ड यसपटक जनमत नै श्रेष्ठ ठानेर चुनावमा फर्किएका छन् ।

०००

५७ वर्षीय खड्गबहादुर विश्वकर्मा ‘प्रकाण्ड’ १८ वर्षपछि मतदाताको घरघर पुगिरहेका छन् । किनभने, उनी आगामी २१ फागुनमा हुने प्रतिनिधिसभा सदस्य चयनका लागि हुने प्रत्यक्ष निर्वाचनमा सदस्य छन् । नेकपा (माओवादी)ले कालिकोटबाट उनलाई उम्मेदवार बनाएको छ ।

कालिकोटको नरहरिनाथ गाउँपालिकाका स्थायी बासिन्दा प्रकाण्डले आइएडसम्म अध्ययन गरेका छन् । शिक्षण पृष्ठभूमिबाट राजनीति प्रवेश गरेका उनी माओवादी आन्दोलनसँग आबद्ध भएर राजनीतिमा स्थापित नेता हुन् ।

१० वर्षे सशस्त्र युद्धबाट तत्कालीन नेकपा माओवादी शान्ति प्रक्रियामा आएपछि २०६४ सालमा भएको पहिलो संविधानसभा निर्वाचनमा प्रकाण्ड कालिकोट १ बाट उम्मेदवार थिए । त्यसबेला उनले २७ हजार ६ सय २९ मत ल्याएर विजयी भए ।

चुनाव जितेपछि २०६५ सालमा महिला, बालबालिका तथा समाज कल्याणमन्त्री भए । २०६७ सालमा पर्यटन तथा नागरिक उड्डयनमन्त्री बने । पहिलो संविधानसभाले संविधान जारी गर्न सकेन । यहीबीच २०६९ सालमा तत्कालीन नेकपा माओवादी विभाजित भयो ।

मोहन वैद्य किरणको नेतृत्वमा भएको विभाजनमा प्रकाण्ड विभाजनतिरै लागे । २०७० सालको संविधानसभामा वैद्य नेतृत्वको पार्टीले चुनाव बहिष्कार गर्‍यो । प्रकाण्ड निर्वाचन बिथोल्ने नीतिमा लागे, उम्मेदवार हुने कुरै भएन ।

२०७१ सालमा वैद्य नेतृत्वको पार्टी पनि फुट्यो र नेत्रविक्रम चन्द नेतृत्वमा अर्को पार्टी बन्यो । प्रकाण्ड नयाँ पार्टीतिर लागे । विप्लव नेतृत्वको पार्टीले पनि त्यसयताका चुनाव बहिष्कार गर्दै आयो । यसपटक यो पार्टी चुनावी मैदानमा छ र प्रकाण्ड पनि झण्डै दुई दशकपछि पुन: संसदीय चुनावमा उम्मेदवार बनेका छन् ।

कालिकोटजस्तो भौगोलिक रूपमा विकट जिल्ला, पूर्वाधार, शिक्षा, स्वास्थ्य र रोजगारीको चुनौतीबीच प्रतिनिधित्व खोजिरहेको अवस्थामा प्रकाण्डले पनि स्थानीय मुद्दालाई संसदमा उठाउने प्रतिबद्धता जनाउँदै मत मागिरहेका छन् । दलित समुदायबाट प्रतिनिधित्व गर्ने उम्मेदवारका रूपमा पनि उनको प्रचार भइराखेको छ । उनी दलित समुदायका प्रख्यात राजनीतिक हस्ती पनि हुन् ।

प्रकाण्डसँग प्रतिस्पर्धीका रूपमा पूर्वसहकर्मीहरू नै छन् । प्रकाण्ड चुनाव बहिष्कार गर्ने नीतिमा अगाडि बढेपछि २०७० सालको चुनावमा तत्कालीन माओवादीबाट महेन्द्रबहादुर शाही विजयी भए । त्यसपछि ऊर्जामन्त्रीसमेत बने । शाहीले २०७४ सालमा प्रदेश सभामा चुनाव लडे । जितेर कर्णालीको पहिलो मुख्यमन्त्री बने । शाहीले २०७९ मा प्रतिनिधिसभा सदस्यमै चुनाव लडे, २३ हजार ७२७ मत ल्याएर विजयी भए । उनै शाही फेरि उम्मेदवार छन् ।

कांग्रेसबाट अनुभवी नेता हर्षबहादुर बम र एमालेका नगीन्द्र शाही उम्मेदवार छन् । राष्ट्रिय स्वतन्त्र पार्टीबाट युवा उम्मेदवार प्रकाश न्यौपाने छन् । यी लगायत सबैलाई पछि पार्दै प्रकाण्डले जित निकाल्नुपर्ने छ । विगतमा किन चुनाव बहिष्कार गरेको जस्ता प्रश्नको जवाफ दिएर जनताको मत जित्नुपर्ने छ ।

व्यक्तिगत विवरण

नाम: खड्गबहादुर विश्वकर्मा ‘प्रकाण्ड’

उमेर : ५७ वर्ष

जन्म : कालिकोट

स्थायी ठेगाना:  कालिकोट नरहरिनाथ गाउँपालिका सल्लारुख, मालकोट कालिकोट