मनसँगै मत जित्ने पहिलो प्रयासमा मनऋषि

जुम्लाबाट प्रतिनिधिसभा सदस्यका लागि प्रत्यक्षतर्फका उम्मेदवार रहेका ४७ वर्षीय मनऋषि धिताल पूर्वपत्रकार तथा लेखक हुन् । उनी जुम्लाको सिञ्जा गाउँपालिकाको धिताललिही निवासी हुन् । स्थानीय स्तरमा शान्त र शालीन व्यक्तिका रूपमा चिनिन्छन् ।

तत्कालीन माओवादीले २०५२ सालदेखि १० वर्षसम्म सञ्चालन गरेको सशस्त्र युद्धको रापताप र संकटपूर्ण समयमा ‘कलम’ लाई हतियार बनाएर परिवर्तनको पक्षमा उभिएका आवाजका रूपमा उनी परिचित छन् । जनयुद्ध ताका ‘जनादेश साप्ताहिक’का सम्पादक कृष्ण सेन इच्छुक बेपत्ता पारिए र पछि उनको हत्या भयो । त्यो अवस्थामा धितालले उक्त पत्रिकाको सम्पादकीय जिम्मेवारी सम्हालेका सम्हालेका थिए । सेना र प्रहरीको कडा निगरानीबीच भूमिगत शैलीमा पत्रिका प्रकाशन गर्नु आफैंमा चुनौती हुँदाहुँदै पनि उनले निरन्तरता दिए । 

धितालका अनुसार त्यसबेला उनी आफ्ना कतिपय लेख र रचनाहरू ‘गुफा प्रेस’ बाटै तयार पार्ने गर्थे । धितालले लेखेका जनयुद्धका कमान्डरहरू र छापामारहरूको यात्रालाई नजिकबाट नियाल्दै ‘गुफा प्रेसका चिठी’, ‘जलयात्रा’, ‘बेनी यात्रा’, ‘आधार यात्रा’, ‘राजमार्ग यात्रा’, ‘पिली यात्रा’ र ‘गण्डक यात्रा’ जस्ता करिब एक दर्जन पुस्तकहरू प्रकाशित छन् ।

तत्कालीन नेकपा माओवादी केन्द्रबाट राजनीति थालेका धिताल पछिल्लो समयमा नेकपा माओवादी र एकीकृत समाजवादी सहितको एकतामा सहभागी भएनन् । धिताल जनार्दन शर्मा संरक्षक रहेको प्रगतिशील लोकतान्त्रिक पार्टीमा आबद्ध भए । 

२०७९ को प्रतिनिधिसभा निर्वाचनका तत्कालीन माओवादीका तर्फबट प्रतिनिधिसभा सदस्यको लागि धितालसहितका नेताहरू नरेश भण्डारी, डाक्टर कलबहादुर रोकाया, गोमा कुँवरको नाम सिफारिस भएको थियो । त्यसबेला गोमा कुँवरले टिकट पाइन् । कुँवरले चुनाव जित्न सकिनन् । 

यसपटक पार्टी फेरिएपछि धिताल उम्मेदवार भएका छन् । तत्कालीन माओवादीबाट बाहिरिएका धिताल जनार्दन शर्माको विश्वास पात्र पनि हुन् । अब उनलाई नेकपा माओवादी केन्द्र र नेकपा एकीकृत समाजवादी सहितका दल मिलेर बनेको नेपाली कम्युनिस्ट पार्टीमा आवद्ध नहुनुको कारण चुनाजी नतिजाबाट जवाफ दिनुछ । विगतमा गरेका कार्य, लेखेका किताबाट जितेको मन मतमा बदलिने उनको विश्वास छ ।