व्यवसायी अनुभवलाई विकासमा बदल्ने संकल्प

आफूले व्यवसायमा प्राप्त गरेको सफलतालाई राजनीति मार्फत देश विकासमा लगाउने उद्देश्य रहेको उनी सुनाउँछन् । यसैलाई उनले जितको प्रमुख आधार मानेका छन् ।

०००

८ फागुन २०३८ सालमा रुकुमको खलंगमा जन्मिएका हुन् राजु केसी । नेपाली कांग्रेसले २१ फागुनमा हुने प्रतिनिधिसभा सदस्य चुनावमा उनै केसीलाई रुकुमपश्चिमबाट उम्मेदवार बनाएको छ ।

सफल व्यवसायीका रूपमा परिचित उनी यसपटक संसद् छिर्ने प्रयासमा छन् ।

२०५२ सालमा बालकुमारी माध्यमिक विद्यालय काठमाडौँबाट एसएलसी उत्तीर्ण गरेका केसी २०५७ सालमा आरआर क्याम्पस पढ्दै गर्दा नेविसंघको सदस्यता लिएर विद्यार्थी राजनीतिमा होमिएका थिए । त्यसको एक वर्षपछि उनले नेपाली कांग्रेसको क्रियाशील सदस्यता लिए । 

केसी कांग्रेसको विदेश विभाग अन्तर्गत जनसम्पर्क विभागको केन्द्रीय सदस्यको भूमिकामा छन् । 

२०५९ सालमा उनले काठमाडौँमा राप्ती भेरी गेस्ट हाउस सञ्चालन गरे । २०६० सालमा गंगा यातायात प्रालिको सुरुवात गरेर उनैले रुकुममा पहिलो पटक गाडी भित्र्याएका थिए । 

केसीकै नेतृत्वमा २०६२ सालमा रुकुममा सहकारीको सुरुवात भएको थियो । त्यसको एक वर्षपछि २०६३ सालमा दाङमा सहयोगी बचत तथा ऋण सहकारी स्थापना गरे । यी दुवै सहकारीमार्फत उनले रोजगारी र आयआर्जनमा धेरैलाई जोडिरहेका छन् । काठमाडौंमा स्कुल, रेस्टुरेन्ट लगायतका व्यवसायमा पनि उनको लगानी छ ।  

कोरोना महामारीको समयमा केसीले जिल्लामा करिब २० लाख बराबरका स्वास्थ्य सामग्री पठाएर मानवीय सेवा पनि गरेका थिए ।

उनीसँग अमेरिका, सिंगापुर, अस्ट्रेलिया, जापान, दक्षिण कोरिया लगायतका देशमा पुगेर विभिन्न विकास तथा व्यावसायिक ज्ञान हासिल गरेको अनुभव पनि छ । 

आफूले व्यवसायमा प्राप्त गरेको सफलतालाई राजनीति मार्फत देश विकासमा लगाउने उद्देश्य रहेको उनी सुनाउँछन् । यसैलाई उनले जितको प्रमुख आधार मानेका छन् ।