डोको रेडियोदेखि प्रतिनिधिसभा यात्रासम्म

२०७४ मा एमाले र २०७९ मा कांग्रेसलाई समर्थन गर्दै क्षेत्रका प्रतिनिधि विजयी गराउन भूमिका खेलेका घिमिरे यस पटक भने आफैं मैदानमा छन् ।

०००

स्याङजा क्षेत्र नम्बर १ मा १२ वर्षपछि पुनः उम्मेदवार बनेका छन् नेपाली कम्युनिस्ट (नेकपा) का केन्द्रीय सदस्य शैलेन्द्र घिमिरे । पत्रकारिता, जनयुद्ध र खुला राजनीतिमा लामो अनुभव बोकेका घिमिरेको उम्मेदवारीलाई स्थानीय स्तरमा अर्थपूर्ण पुनरागमनका रूपमा हेरिएको छ ।

अर्जुनचौपारी गाउँपालिका-५ आरुचौरमा जन्मिएका घिमिरे राजनीतिक मात्र होइन, वैचारिक यात्रामा पनि परिचित नाम हुन् । १० वर्षे सशस्त्र जनयुद्धका क्रममा ‘डोको रेडियो’ सञ्चालन गरेर भूमिगत पत्रकारितामा सक्रिय घिमिरे खुला राजनीतिमा आएपछि ‘लालरक्षक’ पत्रिकाको सम्पादनदेखि ‘समाचार दैनिक’को सम्पादकीय मण्डलसम्म पुगे ।

हाल उनी लेख-रचनामा सक्रिय छन् भने पार्टीको केन्द्रीय सदस्यका रूपमा संगठन सुदृढीकरणमा जुटिरहेका छन् ।

त्रिभुवन विश्वविद्यालयबाट स्नातकसम्म अध्ययन गरेका घिमिरेले २०७० सालमा यही क्षेत्रबाट माओवादी केन्द्रका तर्फबाट उम्मेदवारी दिएका थिए । त्यतिबेला तेस्रो स्थानमा सीमित भए पनि उनी राजनीतिक धारबाट बाहिरिएनन् ।

२०७४ मा एमाले र २०७९ मा कांग्रेसलाई समर्थन गर्दै क्षेत्रका प्रतिनिधि विजयी गराउन भूमिका खेलेका घिमिरे यस पटक भने आफैं मैदानमा छन् ।

२०७२ सालको संविधानसभा निर्वाचनमा पराजय बेहोरेपछि पार्टी संगठनमा सक्रिय बनेका घिमिरे हाल माओवादी केन्द्रको केन्द्रीय समिति सदस्य तथा स्याङजाका जिल्ला इन्चार्ज हुन् । पार्टी भित्र संगठन विस्तार, कार्यकर्ता परिचालन र स्थानीय मुद्दा उठानमा उनी सक्रिय रहँदै आएका छन् ।

स्थानीय विकासका सवालमा पनि घिमिरेको उपस्थिति देखिन्छ । जिल्लाका विभिन्न सामाजिक तथा विकाससम्बन्धी कार्यक्रममा सहभागिता जनाउँदै आएका उनी आफूलाई ‘स्थानीय आवश्यकताबाट राष्ट्रिय नीतिसम्म जोड्ने नेता’का रूपमा प्रस्तुत गर्छन् । पार्टीको नीति र सिद्धान्तमा आधारित भएर काम गर्ने उनको दाबी छ ।

हाल स्थानीय नेताको भूमिकामा सक्रिय घिमिरे पार्टी सुदृढीकरणसँगै जिल्लाको विकासमा योगदान दिने लक्ष्यसहित चुनावी मैदानमा उत्रिएका छन् ।

पत्रकारिता र राजनीतिबीचको सेतु बनेका घिमिरेको पुनरागमनले स्याङजा-१ को चुनावी समीकरणलाई नयाँ मोड दिने अनुमान गरिएको छ ।