शिक्षाप्रेमी सोच, विकासप्रतिको प्रतिबद्धता र सामाजिक सेवामा जुट्दै आएका गुरुङलाई धेरैले अनुभवी, भरोसायोग्य र विकासप्रेमी नेताका रूपमा हेर्ने गरेका छन् ।
०००
२१ फागुनमा हुने प्रतिनिधिसभा निर्वाचनमा नेकपा एमालेका तर्फबाट मीनप्रसाद गुरुङ स्याङ्जा क्षेत्र नम्बर १ को उम्मेदवार बनेका छन् ।
स्याङ्जा जिल्लाको पुतलीबजार नगरपालिका-९, कोल्मा बराहचौरका गुरुङ गण्डकी प्रदेशको राजनीतिक तथा सामाजिक क्षेत्रमा परिचित र विश्वासिला नाम हुन् ।
२०२० साल जेठ १९ गते दलबहादुर गुरुङ र मनकुमारी गुरुङको परिवारमा जन्मिएका गुरुङले सानैदेखि सामाजिक चेतना र नेतृत्व क्षमताको परिचय दिएका थिए । बाजे कुम्भरित गुरुङको संस्कार र परिवारको सरल जीवनशैलीले उनलाई जमिनसँग जोडिएको व्यक्तित्व बनाएको छ ।
शिक्षालाई परिवर्तनको आधार मानेका गुरुङ राजनीतिशास्त्रमा एमए र त्रिभुवन विश्वविद्यालयबाट बीएल उत्तीर्ण छन् ।
विद्यार्थी जीवनदेखि नै राजनीतिमा सक्रिय उनी अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) हुँदै संगठित राजनीतिक यात्रामा होमिएका हुन् । २०३६ सालमै पार्टीको साधारण सदस्य बनेका उनले २०४७ साल माघ १० गते संगठित सदस्यता प्राप्त गरे ।
विद्यार्थी राजनीतिमा अनेरास्ववियुको स्याङ्जा जिल्ला समन्वय समितिका संस्थापक अध्यक्ष रहेका गुरुङ २०३६, २०४६ र २०६२/०६३ का आन्दोलनमा अग्रपंक्तिमा रहे । परिवर्तनका हरेक मोडमा उनी सडक र संगठन दुवैमा सक्रिय देखिए ।
पार्टी संरचनामा गाउँ कमिटी सचिवदेखि इलाका कमिटी सचिव, जिल्ला कमिटी अध्यक्ष हुँदै गण्डकी प्रदेश कमिटी उपाध्यक्षसम्मको जिम्मेवारी सम्हालिसकेका गुरुङ हाल लोकतान्त्रिक आदिवासी जनजाति महासंघका केन्द्रीय प्रतिनिधि तथा नेपाल एसिया जनमैत्री समाजका केन्द्रीय सदस्य छन् ।
जनप्रतिनिधिका रूपमा पनि उनको योगदान उल्लेखनीय छ । कोल्मा बराह गाविस (हाल वडा) का वडा सदस्य, स्याङ्जा जिल्ला विकास समिति सदस्य हुँदै गण्डकी प्रदेशसभा सदस्यसम्मको यात्रामा उनले विकास र जनसरोकारका मुद्दालाई प्राथमिकतामा राखे । जनताको समस्या नजिकबाट बुझ्ने र समाधान खोज्ने कार्यशैलीकै कारण उनी जनप्रिय बनेका छन् ।
राजनीतिसँगै सामाजिक क्षेत्रमा पनि गुरुङको सक्रियता उत्तिकै छ । कोल्मा बराहचौर माध्यमिक विद्यालयका अध्यक्ष, उच्च माध्यमिक विद्यालयको सञ्चालक समिति सदस्य र सामुदायिक क्याम्पसका संस्थापक अध्यक्षका रूपमा उनले शिक्षा क्षेत्रमा गहिरो योगदान दिएका छन् । मुक्तिनाथ विकास बैंक लिमिटेडका सञ्चालक समिति अध्यक्षको जिम्मेवारी सम्हालिसकेका उनी नेपाल रेडक्रस सोसाइटी स्याङ्जा शाखासँग पनि आबद्ध छन् ।
लायन्स क्लब अफ सिर्जना चौतारी, सामुदायिक विद्युत उपभोक्ता समिति तथा घुम्ती-चिसापानी-चित्रे मोटरबाटो निर्माण अभियानका संस्थापक सचिवका रूपमा उनको योगदान स्थानीयले आज पनि स्मरण गर्छन् । भूमिसुधार आन्दोलनमा खेलेको भूमिकाका लागि उनी पश्चिमाञ्चल क्षेत्रकै उत्कृष्ट जनप्रतिनिधिका रूपमा सम्मानित भइसकेका छन् भने अन्तर्राष्ट्रिय रेडक्रस संस्थाबाट पनि सम्मान प्राप्त गरेका छन् ।
शिक्षाप्रेमी सोच, विकासप्रतिको प्रतिबद्धता र सामाजिक सेवामा जुट्दै आएका गुरुङलाई धेरैले अनुभवी, भरोसायोग्य र विकासप्रेमी नेताका रूपमा हेर्ने गरेका छन् ।
