बेथिति सुधार्ने वाचासहित मैदानमा

जापानबाट वातावरणीय विज्ञानमा विद्यावारिधि गरेका ५० वर्षीय रेग्मी सरकारी सेवामा रहँदा देखेको ढिलासुस्ती र भ्रष्टाचार विरुद्ध सुशासन र पारदर्शिताको एजेन्डा बोकेर राजनीतिमा होमिएका हुन्।

०००
राष्ट्रिय स्वतन्त्र पार्टी (रास्वपा) बाट स्याङ्जा–१ मा डा. धनञ्जय रेग्मीले उम्मेदवारी दिएका छन् । स्याङ्जाको पुतलीबजार नगरपालिका–५, पौवैगौंडेमा जन्मिएका उनी नेपाल पर्यटन बोर्डको पूर्व प्रमुख कार्यकारी अधिकृत हुन् ।

५० वर्षीय रेग्मीले जापानको होक्काइदो विश्वविद्यालयबाट पर्यावरण पृथ्वी विज्ञानमा विद्यावारिधी गरेका छन् । रेग्मीले अमेरिका र जापानमा पोस्ट–डाक्टोरल अनुसन्धान तथा व्यावसायिक प्रशिक्षण लिएका छन् । हिमताल, ग्लेसियर, जलवायु परिवर्तन र वातावरणीय जोखिम उनका अध्ययनका मुख्य क्षेत्र हुन् ।

मन्त्री तथा अन्य सरकारी अधिकारीहरूसँग नजिकबाट काम गर्दा उनले ‘भाषण धेरै–काम थोरै, प्रतिबद्धता धेरै–जवाफदेहिता कम’ भएको अनुभव गरे । स्वार्थ, ढिलासुस्ती र भ्रष्टाचारले राम्रो सोच र योजना कसरी थिचिन्छ भन्ने यथार्थ बुझ्ने मौका पाए ।

यस्तो बेथिति देखेर सुशासन, पारदर्शिता र परिणाममुखी राजनीतिलाई एजेन्डा बनाएर राजनीतिमा होमिएको उनी बताउँछन् ।

स्याङ्जा–१ मा रेग्मीले नेपाली कांग्रेसका भरतराज ढकाल, नेकपा एमालेका मिनप्रसाद गुरुङ, नेपाली कम्युनिष्ट पार्टीका शैलेन्द्र घिमिरे, राष्ट्रिय प्रजातन्त्र पार्टीका हुकुमबहादुर राना, उज्यालो नेपालका रविन्द्र मल्ल, श्रम संस्कृतिका पिरन गुरुङ लगायतसँग प्रतिस्पर्धा गर्दैछन् ।

बेथिति देखेर सुशासन, पारदर्शिता र परिणाममुखी राजनीतिलाई एजेन्डा बनाएर चुनावमा होमिएको उनी बताउँछन् ।

२०७९ सालको निर्वाचनमा यो क्षेत्रमा कांग्रेसका राजु थापा ३१ हजार ९९९ मत ल्याएर निर्वाचित हुँदा एमालेका नारायण मरासिनीले २८ हजार ७४४ र रास्वपाका बोधराज रेग्मीले ६ हजार ६५ मत पाएका थिए ।

रास्वपाले समानुपातिकमा प्रत्यक्षको भन्दा झन्डै दोब्बर बढी मत पाएको थियो । समानुपातिकमा रास्वपाले ११ हजार २७६, एमालेले २६ हजार १२ र कांग्रेसले २५ हजार ४३१ मत प्राप्त गरेको थियो ।