संविधानसभा र प्रदेश सभापछि प्रतिनिधिसभामा

शहीदको जीवनीबाट प्रेरित भएर राजनीतिमा लागेका बराल २०५४ सालमा नेकपा (माओवादी)बाट भूमिगत राजनीतिमा होमिए । 

०००

गुल्मीको चन्द्रकोटमा २०३३ सालमा जन्मिएका सुदर्शन बरालको राजनीति एमाले समर्थित अनेरास्ववियुबाट शुरु भयो । शहीदको जीवनीबाट प्रेरित भएर राजनीतिमा लागेका उनी २०४६ सालको जनआन्दोलनमा सहभागी भए ।

२०५४ सालमा नेकपा (माओवादी)बाट भूमिगत राजनीतिमा होमिए । माओवादीको पोलिटब्यूरो सदस्यको जिम्मेवारीमा पुगे ।

२०६४ सालमा गुल्मी–१ बाट संविधानसभा सदस्य निर्वाचित भए । २०७० को संविधानसभा निर्वाचनमा पराजित भए ।

२०७४ सालमा लुम्बिनी प्रदेश सभा सदस्यमा निर्वाचित उनी प्रदेश सामाजिक विकास मन्त्री बने । २०७९ मा प्रदेश सभा सदस्यमा दोहोरिने चाहना भने पूरा भएन । सत्ता गठबन्धनको साथ पाएर माओवादीबाट उम्मेदवारी दिएका उनी एमालेका उम्मेदवारसँग पराजित भए ।

जेनजी आन्दोलनपछि माओवादीले विभिन्न दललाई एकठाउँमा ल्याएर नेपाली कम्युनिष्ट पार्टी गठन गर्‍यो । बरालले त्यही नेपाली कम्युनिष्ट पार्टीबाट उम्मेदवारी दिएका हुन् ।

गुल्मी–१ मा बरालसँगै नेपाली कांग्रेसका डा. चन्द्र भण्डारी, एमालेका प्रदीप ज्ञवाली, राष्ट्रिय स्वतन्त्र पार्टीका सागर ढकाल लगायतले उम्मेदवारी दिएका छन् ।

गत निर्वाचनमा समानुपातिकमा एमालेले २८ हजार ४५३, कांग्रेसले २३ हजार ४१३, रास्वपाले ८ हजार ११६, माओवादीले ६ हजार २५७ र राष्ट्रिय जनमोर्चाले १ हजार २२४ मत पाएको थियो ।