दशकपछि पार्टीलाई जिताउने जिम्मा

बाँकेको नेपालगन्जमा २०३८ वैशाख २ गते जन्मिएका सुधान्सु कोइराला पूर्व प्रधानमन्त्री स्व. सुशील कोइरालाका भतिजा हुन् । उनका बुबा डा. अरुण र आमा किरण कांग्रेस बाँकेको सभापति भइसकेका छन् ।

राजनीतिक माहोलमा हुर्किएका उनले त्रिभुवन विश्वविद्यालयबाट एमबीएस गरेका छन् । राजनीतिमा आउनुअघि सुधान्सुले किष्ट र नबिल बैंकमा काम गरेका थिए । २०६८ सालमा बैंकको जागिर छोडेर तरुण दल मार्फत राजनीति शुरु गरे ।

२०७० देखि २०७२ असोज २३ सम्म सुशील कोइराला प्रधानमन्त्री हुँदा सुधान्सु प्रधानमन्त्री कार्यालयमा अवैतनिक स्वकीय सचिव थिए । त्यतिबेला उनले देशभरिका नेता, कार्यकर्तासँग सम्बन्ध विस्तार गर्ने अवसर पाए ।

२०७२ माघ २६ मा सुशील कोइरालाको निधनपछि सुधान्सु काठमाडौंबाट नेपालगन्ज फर्किएर पूर्णकालीन कार्यकर्ताको रूपमा राजनीतिमा लागे । २०७२ फागुनमा सर्वाधिक मत ल्याएर बाँके कांग्रेस जिल्ला सदस्यमा निर्वाचित भए । २०७८ फागुनमा सम्पन्न १४औं जिल्ला अधिवेशनबाट सचिव चयन भए ।

सुधान्सुले उम्मेदवारी दिएको बाँके–२ मा उनका ठूला बुबा सुशील कोइराला लड्दै आएका थिए ।

२०४८ देखि लगातार पाँच पटक निर्वाचन लडेका कांग्रेसका पूर्व सभापति सुशील कोइराला तीनपटक पराजित भएका थिए । २०५१ र २०६४ को निर्वाचन परिणाम भने उनको पक्षमा आएन । उनले २०४८, २०५६ र २०७० को निर्वाचन जिते ।

नेपालगन्ज उपमहानगरपालिकाको अधिकांश क्षेत्र पर्ने बाँके–२ मा सुशील कोइरालाको निधनपछि कांग्रेसले जितेको छैन । २०७४ मा संघीय समाजवादी फोरमबाट उठेका मोहम्मद ईस्तियाक राईले जिते । २०७९ मा एमाले गठबन्धनका उम्मेदवार राप्रपाका धवलशमशेर राणा २९ हजार ५७७ मत ल्याएर विजयी भए । त्यतिबेला नेपाली कांग्रेसका सुदीपनरसिंह राणाले ४ हजार ४०३ मत पाए ।

जनता समाजवादी पार्टी (जसपा) नेपालबाट उठेका मोहम्मद ईस्तियाक राई २३ हजार ५२० मत ल्याएर दोस्रो भएका थिए । राईले यसपटक एमालेबाट त्यही क्षेत्रमा उम्मेदवारी दिएका छन् ।

२०७९ मा समानुपातिकमा जसपा नेपालले २० हजार २५१, राष्ट्रिय प्रजातन्त्र पार्टीले ११ हजार ३८०, कांग्रेसले १० हजार १९८, एमालेले ९ हजार ३४५, रास्वपाले ४ हजार १०३ र माओवादी केन्द्रले ३ हजार ४४ मत पाएको थियो ।

बाँके–२ मा कुल मतदाता ९७ हजार ८०९ छन् । गत निर्वाचन जितेका धवलशमशेर राणाले उम्मेदवारी नदिनु र दोस्रो स्थानमा आएका ईस्तियाक राईले आफ्नो पार्टी छोडेर अर्को पार्टीबाट उठ्नु सुधान्सुका लागि अनुकूल हुन सक्दछ ।