प्रदेश सभा छोडेर प्रतिनिधिसभातर्फ

नेकपा (एमाले)ले काठमाडौं–६ मा अमनकुमार मास्केलाई प्रतिनिधिसभा सदस्यको उम्मेदवार बनाएको छ । तारकेश्वर नगरपालिका–फुटुङ निवासी ५३ वर्षीय मास्के यसअघि काठमाडौं–६ (२) बाट बागमती प्रदेश सभा सदस्यमा निर्वाचित भएका थिए । प्रदेशसभा सदस्य पदबाट राजीनामा दिएर उनी संघीय संसद्को चुनावी मैदानमा उत्रिएका हुन् ।

स्थानीय तहमा राम्रो सम्बन्ध भएकाले उनलाई एमालेले उम्मेदवार बनाएको हो । बागमती प्रदेश सरकारमा उनी भौतिक पूर्वाधार विकास मन्त्री समेत बने । स्नातकोत्तर तह पूरा गरेका उनी एमालेका केन्द्रीय सदस्य हुन् ।

२०७९ मा प्रदेश सभामा चुनाव जितेको अनुभव उनी प्रतिनिधिसभा निर्वाचनमा प्रयोग गर्दैछन् । तर उनका प्रतिद्वन्द्वीहरू पनि अनुभवहीन चाहिं छैनन् ।

अघिल्लो चुनावका विजेता राष्ट्रिय स्वतन्त्र पार्टी (रास्वपा)का शिशिर खनाल यही क्षेत्रका उम्मेदवार छन् । कांग्रेसबाट कृष्ण बानियाँ क्षेत्री, नेपाली कम्युनिस्ट पार्टीबाट हिमाल शर्मा, उज्यालो नेपाल पार्टीबाट वारिस धरेल र राष्ट्रिय प्रजातन्त्र पार्टी (राप्रपा) बाट उद्धवराज भेटुवाल सहितका उम्मेदवार चुनावी मैदानमा छन् ।

काठमाडौं–६ मा ६७ हजार १४१ मतदाता छन् । २०७९ को निर्वाचनमा रास्वपाका खनाल १४ हजार २२१ मत सहित निर्वाचित हुँदा एमालेका सर्वेन्द्र खनालले ८ हजार ९१७ र कांग्रेसका भीमसेनदास प्रधानले आठ हजार ८१२ भोट पाएका थिए ।

समानुपातिकमा रास्वपाले ११ हजार ९९६, एमालेले ८ हजार १९, कांग्रेसले ७ हजार ५७७, राप्रपाले ४ हजार ६१०, माओवादी केन्द्रले १ हजार ८०२ मत ल्याएको थियो ।