पूर्वएआईजीको सांसद् बन्ने संघर्ष
नेपाल प्रहरीका पूर्व एआईजी विश्वराज पोखरेल यतिबेला ओखलढुंगाका मतदाता रिझाउन गाउँगाउँ पुगिरहेका छन्। गत १२ मंसिरमा राष्ट्रिय स्वतन्त्र पार्टी प्रवेश गरे लगत्तैबाट उनी चुनावी अभियानमा जुटेका हुन्।
उनले ओखलढुंगा पुगेर मत माग्न थाल्दा अन्य दलका उम्मेदवार टुंगिएकै थिएनन्। यसरी तुलनात्मक बढी चुनावी अभियान चलाउने अवसर सिर्जना गरेका उनी चुनाव जित्ने आधार तयार पारिसकेको बताउँछन्।
तर उनले सोचे जस्तो चुनाव जित्न सजिलो भने देखिंदैन। लामो राजनीतिक पृष्ठभूमि भएका दलहरूसँग अझै पनि तल्लो तहसम्म फैलिएको संगठन र कार्यकर्ताको पंक्ति छ। तर यसपटक जनताले परिवर्तन रोज्ने विश्वास रास्वपाका अरू उम्मेदवार जस्तै पोखरेलले पनि लिएका छन्।
यसरी पोखरेललाई राजनीतिको मैदानमा उतार्ने पृष्ठभूमि भने जेनजी आन्दोलनले मात्र नभएर सरकारको निर्णयका कारण पनि तयार भएको थियो। खासमा उनी नेपाल प्रहरीको आईजी बन्ने स्वाभाविक दौडमा थिए।
तर सरकारले आफूभन्दा १६ महिना जुनियर एआईजी धीरजप्रताप सिंहलाई १८ वैशाख २०७९ मा आईजीपी बनायो। आफैंले एआईजीको दर्ज्यानी चिह्न लगाएको व्यक्ति आईजीपी बनेपछि पोखरेलले प्रहरीबाट राजीनामा दिए।
अहिले त्यही प्रहरी सेवामा रहँदाका अनुभव र योगदानलाई आफ्नो योग्यता मानेर मत मागिरहेका छन्। र चुनावका लागि उनले आफ्नै गृहजिल्ला ओखलढुंगा रोजेका छन्।
२०२३ सालमा ओखलढुंगामा जन्मिएका पोखरेल २०४९ सालमा प्रहरी निरीक्षकमा भर्ना भएका थिए। इन्स्पेक्टर हुँदा उनले काठमाडौं उपत्यकाका तीन जिल्लाको अनुसन्धान गर्ने मुख्य जिम्मेवारी पाएको अपराध अनुसन्धान कार्यालयमा बसेर काम गरेका थिए। डीएसपी हुँदा काठमाडौंकै एक वृत्त प्रमुख भए।
डीएसपीमै रहेका बेला २०६४ सालको चुनाव हुँदा उनी जिल्ला प्रहरी कार्यालय संखुवासभाको प्रमुख थिए। एसपी हुँदा उनले जिल्ला प्रहरी कार्यालय मोरङको प्रमुख भएर काम गरे; जुनबेला दोस्रो संविधानसभाको निर्वाचन भयो।
एसपी हुँदै उनी प्रहरी प्रधान कार्यालयको कर्मचारी प्रशासन शाखा, जिल्ला प्रहरी परिसर काठमाडौंको ट्वाइसी भएर काम गरे। एसएसपी हुँदा जिल्ला प्रहरी परिसर काठमाडौंको कमाण्ड सम्हाले। ट्राफिक प्रहरी, विमानस्थल सुरक्षा, लागूऔषध नियन्त्रण ब्यूरो जस्ता युनिटको नेतृत्व गरे।
उनले लाइबेरिया र हाइटीमा दुई वर्ष मिसनमा काम गरे। प्रहरी बाहेक उनीसँग थप दुई क्षेत्रको अनुभव छ।
२०३९ सालमा रुम्जाटार माध्यमिक विद्यालयबाट एसएलसी पास गरेपछि उनी काठमाडौं छिरे। नेपाल ल क्याम्पसबाट २०४६ सालमा बीएल उत्तीर्ण गरे। अनि लोकसेवा पास गरेर न्याय सेवा अन्तर्गत डिट्ठाको जागिरे भए।
डिट्ठा हुनुअघि पोखरेलले विकास सेवातर्फको खरिदारमा स्थायी नाम निकालेका थिए। विकास सेवामा पनि काम गरेका उनले प्रहरी सेवा बाहेक न्याय र विकासतर्फ गरी ७ वर्ष काम गरेको अनुभव छ। समग्रमा प्रहरीमा २९ वर्ष सहित उनले ३६ वर्ष सरकारी सेवाका तीन क्षेत्रमा काम गरेका छन्।
Battleground Analysis
अनुकूलता
- नेपाल प्रहरीमा आईजीपी हुँदासम्म बनाएको व्यक्तित्व र अनुभव।
- अन्य दलका उम्मेदवार भन्दा बढी प्रचार–प्रसारको अवधि सिर्जना।
- नयाँ राजनीतिक शक्तप्रति मतदातामा रहेको आकर्षण।
प्रतिकूलता
- बलियो राजनीतिक संगठनको अभाव। परम्परागत दलहरूसँग जस्तो तल्लो तहसम्म फैलिएको संगठन र कार्यकर्ता सञ्जाल रास्वपासँग नहुनु।
- राजनीतिक अनुभवको कमी। प्रशासनिक अनुभव भए पनि प्रत्यक्ष राजनीतिक प्रतिस्पर्धामा नयाँ भएकाले चुनावी रणनीतिमा चुनौती।
- स्थापित दलहरूसँगको कडा प्रतिस्पर्धा। लामो समयदेखि सक्रिय दल र नेताहरूको प्रभाव रहेकाले चुनाव जित्नु सहज देखिंदैन।
विश्वराज पोखरेलको प्रोफाइल पढेर तपाईंलाई कस्तो लाग्यो ?
