कांग्रेस बदल्ने समूहका कुमारलाई विरासत धान्ने चुनौती

नेपाली कांग्रेसको बलियो इतिहास बोकेको ओखलढुंगाले यसपटक नयाँ अनुहारलाई अगाडि सारेको छ । ठूला राजनीतिक परिवर्तनहरूका योद्धा बलबहादुर राई र उनको लिगेसी सहित ओखलढुंगाबाट चुनाव लड्दै आएका रामहरि खतिवडा यसपटक उम्मेदवार छैनन् । उनको साटो नेतृत्व फेरिएको कांग्रेसले ओखलढुंगाबाट कुमार लुइँटेललाई उम्मेदवार बनाएको छ ।

२०३० साल असोजमा ओखलढुंगाको बलखुमा जन्मिएका कुमार विद्यार्थी संघबाट राजनीतिमा आएका नेता हुन् । २०४५ सालमा पद्मोदय हाइस्कूल नेवि संघको इकाइ समिति सचिवबाट उनको राजनीति सुरु भएको थियो।

विज्ञान तथा द्वन्द्व शान्ति र विकास अध्ययनमा स्नातकोत्तर लुइँटेल २०४७ देखि २०५१ सालसम्म नेविसंघको इकाइ सदस्य र उपसभापति रहे । केन्द्रीय समिति अन्तर्गत विभिन्न उपसमितिमा काम गरेका उनी २०५३ सालमा नेविसंघ ओखलढुंगाको कोषाध्यक्ष र २०६३ मा केन्द्रीय सदस्य भए । २०६२\०६३ को दोस्रो जनआन्दोलनमा उनले महत्त्वपूर्ण भूमिका निभाए ।

त्यसबेला उनले जनआन्दोलन परिचालन समितिको जिल्लाको सचिव भएर काम गरेका थिए । २०६४ सालमा कांग्रेस ओखलढुंगाको जिल्ला सदस्य र २०६५ मा सहसचिव भए । २०६८ यता निरन्तर महाधिवेशन प्रतिनिधि र महासमिति सदस्य छन् ।

गगन थापा स्वास्थ्यमन्त्री हुँदा सल्लाहकार रहेका उनी पहिलोपटक संसदीय निर्वाचन लड्दैछन् । अरू दलका उम्मेदवार भन्दा उनी अध्ययन र पार्टी राजनीतिका हिसाबले अनुभवी मानिन्छन् ।

रामहरि खतिवडालाई पछि पार्दै टिकट पाएका उनी नेकपाका अम्बिरबाबु गुरुङ, एमालेकी अस्मिता थापा र रास्वपाका विश्वराज पोखरेलसँग प्रतिस्पर्धा गरेर जित निकाल्ने दाउमा छन् ।

प्रमुख प्रतिस्पर्धी दल एमालेका पदाधिकारीहरू नेकपामा गएपछि एमालेका उम्मेदवार थापासँग प्रतिस्पर्धा केही सहज हुने अनुमान गरिएको छ