मोरङ–२ काे ‘बालेन’ भनेर चिनाइरहेका अग्रवाल

२१ फागनुकाे  प्रतिनिधि सभा सदस्य निर्वाचनका लागि मोरङ–२, बाट उम्मेदवार बनेका दीलिपकुमार अग्रवाल पूर्व मेयर हुन् । रंगेली नगरपालिकामा दुई कार्यकाल मेयर निर्वाचित उनलाई यसपटक नेकपा एमालेले प्रतिनिधि सभा सदस्यको उम्मेदवार बनाएको छ । 

आफूलाई यो क्षेत्रका ‘बालेन’ भनेर चिनाइरहेका अग्रवालले मेयर भएर गरेका कामलाई चुनाव जित्ने थप आधार बनेका छन् । मेयरको भूमिका बाहेक पनि उनको परिचय यो क्षेत्रमा स्थापित छ । 

५९ वर्षीय अग्रवाल मोरङका पुराना इटा व्यवसायी हुन् । यद्यपि राजनीतिक पृष्ठ्भूमि भने अस्थिर छ । छोटो समयमै कांग्रेस, एमाले र माओवादी भइसकेका छन् । २०७४ सालमा मेयर जित्दा गर्दा उनी नेकपा माओवादी केन्द्रमा थिए । 

माओवादीकै चिह्नबाट मेयर जितेपछि उनी एमाले प्रवेश गरे । एमाले भएरै २०७९ सालको चुनावमा मेयर दोहोरिएर जिते । उनलाई एमालेमा ल्याउन अध्यक्ष केपी शर्मा ओलीकै रुचि देखिएको थियो । 

हेलिकोप्टर चढेर अग्रवाललाई एमालेमा प्रवेश गराउन ओली रंगेली आएका थिए । माओवादी र एमाले हुनुअघि उनी कांग्रेस थिए । पार्टी फेरिरहे पनि व्यवसायी पृष्ठभूमि रहेको र दुईपटक मेयर जितेकाले आफूलाई विकास प्रेमी नेताका रुपमा अग्रवालले चिनाउँदै आएका छन् । 

एमालेले पनि अग्रवाललाई विश्वास गरेको देखिन्छ । विश्वास गरेरै यो क्षेत्रबाट चुनाव जित्दै आएका ऋषिकेश पोखरेलको साटो अग्रवाललाई टिकट दिइएको बुझ्न सकिन्छ । पूर्व सांसद पोखरेल भने यतिबेला अग्रवाललाई जिताउने अभियानको नेतृत्व गरिरहेका छन् । 

अग्रवालसँगको प्रतिश्पर्धामा भने पूर्णकालीन र अनुभवी नेताहरु छन् । नेपाली कांग्रेसबाट डा.मिनेन्द्र रिजाल यही क्षेत्रबाट उम्मेदवार छन् भने नेपाली कम्युनिष्ट पार्टीले लामो समय मोरङ एमालेको राजनीति गरेका चन्द्रवीर राईलाई अगाडि सारेको छ ।