नीति निर्माणमा अनुभवी

२०२९ साल साउन २७ गते बैतडीको दशरथचन्द नगरपालिका–१, शाहीलेकमा जन्मिएका डा. दीपकप्रकाश भट्ट कञ्चनपुरको भीमदत्त नगरपालिका–६ मा स्थायी रूपमा बसोबास गर्दै आएका छन् । आसन्न प्रतिनिधिसभा निर्वाचनमा उनी नेकपा एमालेका तर्फबाट कञ्चनपुर निर्वाचन क्षेत्र–३ का उम्मेदवार हुन् ।

महादेव र नन्दादेवी भट्टका छोरा डा. भट्टले प्रारम्भिक शिक्षा दार्चुलाको मार्मा गाउँपालिकास्थित लटिनाथ माध्यमिक विद्यालयबाट प्राप्त गरेका थिए । २०४१ सालमा कञ्चनपुरको बैजनाथ माध्यमिक विद्यालयबाट आधारभूत तह पूरा गरेका उनले २०४४ सालमा एसएलसी उत्तीर्ण गरे ।

उच्च शिक्षाका लागि भारत गएका भट्टले पिथौरागढस्थित सरकारी इन्टर कलेजबाट इन्टरमिडिएट अध्ययन पूरा गरे । त्यसपछि पिथौरागढकै डिग्री कलेजबाट बीएस्सी अध्ययन गरेका उनले २०५१ सालमा एमएससी अध्ययन सम्पन्न गरे ।

२०५६ सालमा भारतको देहरादुनबाट राजनीतिशास्त्रमा स्नातकोत्तर गरेका भट्टले भारतकै प्रतिष्ठित जवाहरलाल नेहरू विश्वविद्यालय (जेएनयू), नयाँदिल्लीबाट अन्तर्राष्ट्रिय सम्बन्ध विषयमा विद्यावारिधि प्राप्त गरे ।

भट्टले राजनीति प्रवासबाटै शुरु गरेका हुन् । पञ्चायती शासन विरुद्धको आन्दोलन र प्रजातन्त्र प्राप्तिको संघर्षबाट प्रभावित भएर उनी आन्दोलनमा सक्रिय सहभागी भए ।

२०४५ सालमा अखिल भारत नेपाली स्वतन्त्र विद्यार्थी युनियन (अभानेस्ववियु) को पिथौरागढ नगर कमिटीमा आबद्ध भए । २०४८ मा क्षेत्रीय समिति, २०५१ मा केन्द्रीय समिति हुँदै २०५७ सालमा केन्द्रीय अध्यक्ष निर्वाचित भए । उनले अभानेस्ववियुको केन्द्रीय अध्यक्षको जिम्मेवारी दुई कार्यकाल निर्वाह गरे ।

सोही अवधिमा पिथौरागढस्थित पार्टी नगर कमिटीको जिम्मेवारीमा रहेर संगठन निर्माणमा सक्रिय रहेका भट्ट २०५७ सालमा भारत प्रवास समन्वय कमिटी सदस्य बने ।
भट्टले २०६५ मा एमालेको महाकाली सम्पर्क कमिटी इन्चार्ज, केन्द्रीय सम्पर्क समन्वय कमिटी सदस्य तथा २०६७ सालमा पार्टीको केन्द्रीय अर्थ तथा योजना विभाग सदस्यको जिम्मेवारी सम्हाले ।

२०७२ सालमा पार्टीको केन्द्रीय विभाग सदस्य बनेका उनले २०७९ सालमा सोही कमिटीको सचिवको जिम्मेवारी पाए । २०८१ सालमा उनी एमालेको केन्द्रीय सल्लाहकार परिषद् सदस्यका रूपमा क्रियाशील रहे ।

२०७४ सालको प्रतिनिधिसभा निर्वाचनमा कञ्चनपुर–३ बाट निर्वाचित भएर भट्टले संसदीय यात्रा शुरु गरे । संघीय संसद्को अन्तर्राष्ट्रिय सम्बन्ध समितिको सदस्यका रूपमा उनले काम गरे ।

निजगढ अन्तर्राष्ट्रिय विमानस्थल निर्माण सम्बन्धी उपसमितिको संयोजक तथा वाइडबडी र न्यारोबडी विमान खरिद प्रकरण छानबिन संसदीय उपसमितिको संयोजकको जिम्मेवारी पनि भट्टले सम्हाले ।

भट्टले ग्लोबल सेन्टर फर क्लाइमेट एन्ड सेक्युरिटी गभर्नेन्स (काठमाडौं–सिड्नी) को अध्यक्षका रूपमा पनि काम गरेका छन् । यसअघि उनी नेपाल सेन्टर फर सेक्युरिटी गभर्नेन्सका निर्देशक थिए ।

उपप्रधानमन्त्री तथा परराष्ट्र मन्त्रीको नेतृत्वमा गठित उच्चस्तरीय परराष्ट्र नीति समीक्षा कार्यदलका सदस्य (सन् २०१७) तथा संघीय संरचनामा नेपाली सेना र नेपाल प्रहरी पुनर्संरचना सम्बन्धी उच्चस्तरीय कार्यदलका विशेषज्ञ सदस्य (२०१६) का रूपमा उनले नीतिगत योगदान दिएका छन् ।

शैक्षिक क्षेत्रमा उनी सशस्त्र प्रहरी बल कमाण्ड एन्ड स्टाफ कलेज, नेपाली सेना उच्च कमाण्ड तथा व्यवस्थापन तालिम, नेपाली सेना कमाण्ड एन्ड स्टाफ कलेजमा भिजिटर प्राध्यापकका रूपमा अध्यापन गराउँदै आएका छन् ।

त्रिभुवन विश्वविद्यालय अन्तर्गत अन्तर्राष्ट्रिय सम्बन्ध तथा कूटनीति तथा द्वन्द्व, शान्ति र विकास अध्ययन केन्द्रमा प्राध्यापक तथा विषय समितिका सदस्यका रूपमा उनी लामो समयदेखि संलग्न छन् ।

शान्ति प्रक्रियामा उनले माओवादी सेना समायोजन तथा पुनर्स्थापना सम्बन्धी विशेष समिति (सन् २०१०–२०१२) को सचिवालय सदस्यका रूपमा महत्वपूर्ण भूमिका निर्वाह गरेका थिए ।
लामो राजनीतिक अनुभव, उच्च शैक्षिक पृष्ठभूमि र नीतिगत स्पष्टता सहित शालीन तथा भद्र छविका भट्टलाई एमालेले कञ्चनपुर–३ बाट उम्मेदवार बनाएको छ ।

उनीसँग यो क्षेत्रमा नेपाली कांग्रेसले पूर्व जिल्ला सभापति हरिप्रसाद बोहरालाई उम्मेदवार बनाएको छ । यस्तै नेपाली कम्युनिष्ट पार्टीबाट मानबहादुर सुनार, राष्ट्रिय स्वतन्त्र पार्टीबाट ज्ञानेन्द्र महता तथा राप्रपाबाट पूर्णबहादुर चन्द चुनावी मैदानमा छन् ।

प्रतिनिधिसभा निर्वाचन २०७९ मा कञ्चनपुर–३ बाट कांग्रेस नेता रमेश लेखक विजयी भएका थिए । उनले ३० हजार ५७५ मत पाएका थिए । लेखकका निकटतम प्रतिद्वन्द्वी एमाले नेतृ निरुदेवी पालले १८ हजार ४८५ मत ल्याएकी थिइन् ।

आगामी फागुनमा हुन गइरहेको निर्वाचनमा कांग्रेस र एमालेले कञ्चनपुर–३ मा साविक विजेतालाई टिकट दिएको छैन ।

प्रस्तुति:  मदन गिरी