मेयरपछि सांसद बन्ने दाउ
घनश्याम पाण्डे
नेकपा (एमाले) केन्द्रीय सदस्य घनश्याम पाण्डे २४ वर्षको उमेरमै उपमेयर बनेका थिए । तुलसीपुर उपमहानगरपालिका–८, अस्वारामा २०३० सालमा जन्मिएका उनी २०४३ सालमा अनेरास्ववियूमा लागे ।
२०४६ सालमा अनेरास्ववियु जिल्ला सदस्य भएका पाण्डेले २०४७ पुस ९ गते पार्टी सदस्यता प्राप्त गरेका थिए । त्रिभुवन बहुमुखी क्याम्पस, पाल्पाबाट बीएस्सी उत्तीर्ण गरेका उनी त्यही क्याम्पसमा २०५२ मा स्ववियु उपसभापति निर्वाचित भएका थिए ।
२०६२/६३ को जनआन्दोलनका क्रममा एक महिना प्रहरी हिरासतमा परे । राजनीतिसँगै पाण्डेले सामुदायिक वनको क्षेत्रमा पनि काम गर्दै आएका छन् । सामुदायिक वन महासंघको केन्द्रीय अध्यक्ष भइसकेका पाण्डेले संयुक्त राष्ट्रसंघको महासभामा सामुदायिक वनको मुद्दालाई उठाइसकेका छन् ।
सहकारी तथा गरिबी निवारण विभागको केन्द्रीय सदस्यका रूपमा पनि क्रियाशील उनी सामुदायिक सञ्चार, शिक्षा, बैंक तथा वित्तीय विकास, कृषि तथा बजारीकरण जस्ता काममा पनि सक्रिय छन् ।
२०६४ मा एमालेको केन्द्रीय प्राकृतिक स्रोत विभाग सदस्य समेत भएका पाण्डे अहिले अखिल नेपाल किसान महासंघको केन्द्रीय उपाध्यक्ष समेत रहेका छन् । ११औं महाधिवेशनबाट एमाले केन्द्रीय सदस्य निर्वाचित भएका छन् ।
सरकारी र निजी विद्यालयमा अध्यापन गर्दै आएका पाण्डे २०५४ सालको स्थानीय निकाय चुनावमा तुलसीपुर उपमहानगरपालिकाको उपमेयर निर्वाचित भएका थिए । त्यसको ठीक दुई दशकपछि २०७४ मा तुलसीपुर उपमहानगरपालिकाको मेयरमा निर्वाचित भए ।
२०७९ मा एमालेबाट उठेकी कोमल वलीले २९ हजार ९२ मत प्राप्त गरेकी थिइन् । गठबन्धनबाट उठेका कांग्रेसका दीपक गिरी ३६ हजार ९११ मत सहित निर्वाचित भएका थिए । गिरीलाई कांग्रेसले फेरि उम्मेदवार बनाएको छ । विपक्षीहरूको गठबन्धन नहुनु पाण्डेका लागि अनुकूल हो ।
समानुपातिकमा कांग्रेस र एमालेले पाएको मतमा धेरै अन्तर छैन । कांग्रेसले २६ हजार ५७५ र एमालेले २६ हजार ११७ भोट ल्याएको थियो । माओवादीले १० हजार ९२६ र राष्ट्रिय प्रजातन्त्र पार्टीले २ हजार ७०८ मत पाएको थियो ।
–प्रस्तुति : गिरिराज नेपाली
घनश्याम पाण्डे को उम्मेदवारि कस्तो लागयो ?
