संसदीय राजनीतिका खेलाडी

२०१३ फागुन ११ मा जन्मिएका नेपाली कांग्रेसका नेता ज्ञानेन्द्रबहादुर कार्की सुनसरीको बराहक्षेत्र नगरपालिका १० प्रकाशपुरका स्थायी बासिन्दा हुन् । २०२८ सालबाट राजनीति सुरू गरेका कार्कीले राजनीतिशास्त्रमा स्नातकोत्तरसम्म अध्ययन गरेका छन् ।

कांग्रेसको भ्रातृ संगठन नेपाल विद्यार्थी संघ (नेविसंघ) को केन्द्रीय अध्यक्ष भइसकेका कार्कीसँग लामो समयसम्म पार्टीको केन्द्रीय कार्यसमिति रहेर सक्रिय राजनीति गरेको अनुभव छ । एक पटक समानुपातिकतर्फबाट प्रतिनिधिसभा सदस्य भएका कार्की २०७४ र २०७९ मा सुनसरी–४ बाट प्रत्यक्ष निर्वाचित भएका थिए ।

उनले अर्थमन्त्री, ऊर्जा जलस्रोत तथा सिँचाइमन्त्री, कानुन, न्याय तथा संसदीय मामिलामन्त्री र सञ्चार तथा सूचना प्रविधिमन्त्री भएर जिम्मेवारी बहन गरिसकेका छन् ।
निवर्तमान सभापति शेरबहादुर देउवाका विश्वास पात्र भनेर चिनिने कार्की कांग्रेसको विशेष महाधिवेशनपछि निवर्तमान केन्द्रीय सदस्य हुन् ।

विशेष महाधिवेशनपछि चयन भएको कांग्रेसको नयाँ नेतृत्वले उनलाई आसन्न प्रतिनिधिसभा निर्वाचनमा फेरि सुनसरी–४ मा उम्मेदवार बनाएको छ ।
यहाँ नेकपा एमालेबाट जगदिशप्रसाद कुसियैत र नेपाली कम्युनिस्ट पार्टीबाट महमद महफुज अन्सरी उम्मेदवार छन् ।

राष्ट्रिय स्वतन्त्र पार्टी (रास्वपा) ले सुनसरी–४ का लागि दीपककुमार साह र राष्ट्रिय प्रजातन्त्र पार्टी (राप्रपा) ले प्रेमप्रसाद भट्टराईलाई उम्मेदवार बनाएको छ ।
कांग्रेस नेता कार्की उम्मेदवार रहेको सुनसरी–४ मा १७ जना विभिन्न दलबाट र १६ जना स्वतन्त्र उम्मेदवारहरू चुनावी प्रतिष्पर्धामा छन् ।

प्रतिनिधिसभा निर्वाचन २०७९ मा कार्की यही क्षेत्रमा झिनो (११०) मतले निर्वाचित भएका थिए । कार्की ३० हजार ४८३ मतका साथ प्रतिनिधिसभा सदस्यमा निर्वाचित हुँदा निकटतम प्रतिद्वन्द्वी कुसियैत (एमाले) ले ३० हजार ३७१ मत पाएका थिए ।

तेस्रो भएका राप्रपाका विध्यानन्द यादवले ३२ सय ३२ मत पाउँदा रास्वपाका जीवनकुमार श्रेष्ठ ३१ सय ८१ मत ल्याएर चौथो भएका थिए ।