सम्मृद्ध नेपाल निर्माणको एजेन्डा लिएर चुनावी मैदानमा

केशवराज पाण्डे नुवाकोट-२ का लागि "अनुभवी, बौद्धिक र सांगठनिक रूपमा मजबुत" उम्मेदवार हुन्। मन्त्री हुँदा उनले बनाएको विकासको छवि र एमालेको संगठित मत नै उनको जितको मुख्य मेरुदण्ड हो।

०००

नेकपा एमालेले नुवाकोट क्षेत्र नं. २ मा दोस्रोपटक प्रतिनिधिसभाका लागि केशवराज पाण्डेलाई उम्मेद्वार बनाएको छ । मुलुक जोगाउन र विदेशी हस्तक्षेप रोक्दै सम्मृद्ध नेपाल निर्माण गर्न आफ्नो जित अत्यावश्यक रहेको एजेडा लिएर उनी निर्वाचनमा होमिएका छन् ।

२०२२ साउन २१ गते नुवाकोटको बेलकोटगढी नगरपालिका वडा नं. १३ मदानपुरमा जन्मिएका पाण्डे यसअघि २०७४ सालमा तत्कालीन नेकपा माओवादी केन्द्रको सहयोगमा बागमती प्रदेश सभामा निर्वाचित भई प्रदेशको आन्तरिक मामिला तथा कानुनमन्त्री बन्न सफल भएका थिए । त्यतिबेला उनले कांग्रेसका जगदीश्वरनरसिंह केसीलाई पराजित गरे । अहिले पुन: उनीसँगै पाण्डेको प्रतिस्पर्धा हुँदैछ । २०७० को दोस्रो संविधानसभा निर्वाचनमा उनका दाजु अर्जुननरसिंह केसीसँग पाण्डे पराजित भएका थिए ।

२०७८ मा एमालेको बागमती प्रदेशको अध्यक्षमा चुनिए । अनेरास्ववियुबाट राजनीतिक जीवनमा प्रवेश गरेका विज्ञान र समाजशास्त्रका स्नातकोत्तर उपाधि प्राप्त गरेका छन् । पञ्चायती व्यवस्थामा राजनीतिमा सक्रिय बुवाबाट परिवारका जेठा छोरा पाण्डेमा राजनीतिक चेतना शुरु भएको देखिन्छ ।

गाउँकै शक्ति माविबाट अध्ययन सुरुवात गरेका पाण्डेले काठमाडौंको शान्ति शिक्षा मन्दिरबाट एसएलसी पूरा गरे । उच्च शिक्षा अमृत साइन्स क्याम्पस बीएसी पूरा गर्दै त्रिभुवन विश्वविद्यालय केन्द्रीय क्याम्पसबाट एमएससी उत्तीर्ण गरे । २०७३ सालमा त्रिभुवन विश्वविद्यालय अन्तर्गत मदन भण्डारी क्याम्पसबाट समाजशास्त्रमा स्नातकोत्तरको दोस्रो डिग्री थपे ।

२०३६ को जनमत संग्रहपछि अमृत साइन्स क्याम्पसमा भर्ना भएका पाण्डे  सोहि वर्ष अनेरास्ववियु (पाँचौं)को क्याम्पस प्रारम्भिक कमिटी हुँदै २०४२ सालमा अनेरास्ववियुको नुवाकोट जिल्ला अध्यक्ष बने । २०४४ सालमा उनी अनेरास्ववियु बागमतीको अध्यक्ष चुनिएपछि २०४५ सालको स्ववियु निर्वाचनमा अमृत साईन्स क्याम्पसमा अनेरास्ववियु तर्फबाट उम्मेद्वार बनेका उनी सभापतिमा निर्वाचित भए ।

२०६२ को आठौँ राष्ट्रिय महाधिवेशनपछि पार्टीको विदेश विभाग सचिवको रुपमा जिम्मेवारी बहन गरी जनआन्दोलनको पक्षमा अन्तराष्ट्रिय जनमत तयार गर्न उल्लेख्यीय भूमिका निर्वाह गरे । २०७५ चैत्र अन्तिमदेखि नेकपा एमाले बागमती प्रदेश सभाको मुख्य सचेतक बनेका पाण्डे २०७७ माघ अन्तिमदेखि डोरमणि पौडेल मुख्यमन्त्री हुँदा आन्तरिक मामिलामन्त्री र अष्टलक्ष्मी शाक्य मुख्यमन्त्री हुँदा आन्तरिक मामिला तथा भौतिक पूर्वाधार मन्त्रीको रुपमा कुशलतापूर्वक जिम्मेवारी बहन गरे ।