'हेभीवेट' उम्मेदवार हराउने योजनामा कुसुम

नेपाली कांग्रेसबाट एक मात्र निर्वाचन क्षेत्र रहेको रूकूम पूर्वमा पार्टी केन्द्रीय सदस्य कुशुमदेवी थापा मगरले उम्मेदवारी दिएकी छन् । पुथा उत्तरगंगा गाउँपालिका–१०, तक स्थायी घर भएकी मगरको जन्ममिति २०२९ भदौ २९ हो ।

२०५२ मा नेपाल विद्यार्थी संघबाट राजनीति शरू गरेकी उनी कांग्रेस भातृसंगठन नेपाल राष्ट्रिय मगर संघको संस्थापक सदस्य हुँदै केन्द्रीय उपसभापति बनिन् । नेपाल महिला संघको तेस्रो महाधिवेशन केन्द्रीय कोषाध्यक्षको उम्मेदवारी दिएकी थिइन् ।

त्रिभुवन विश्वविद्यालयबाट स्नातकोत्तर गरेकी मगर विघटीत प्रतिनिधिसभा सदस्य हुन् ।

रुकूम पूर्वमा नेपाली कम्युनिष्ट पार्टीबाट पूर्व प्रधानमन्त्री पुष्पकमल दाहाल ‘प्रचण्ड’, नेकपा एमालेबाट लिलामणि गौतम र रास्वपाबाट लखनकुमार थापा उठेका छन् । यो क्षेत्रमा गत निर्वाचनमा समानुपातिक तर्फ माओवादी केन्द्रले ८ हजार २७१, कांग्रेसले ५ हजार ६९२ र एमालेले ३ हजार ६५९ मत ल्याएको थियो ।

२०७९ को निर्वाचनमा माओवादी केन्द्रका पूर्णबहादुर घर्ती मगर १२ हजार २६२ मत ल्याएर निर्वाचित हुँदा एमालेका कैलाश मल्लले ५ हजार २११ मत पाएका थिए । कांग्रेस, एकीकृत समाजवादी, राष्ट्रिय जनमोर्चाले माओवादीसँग गठबन्धन गरेको थियो । त्यतिबेला ३७५ मत पाएको एकीकृत समाजवादी र माओवादी लगायतका दल मिलेर नेपाल कम्युनिष्ट पार्टी बनेको हो ।

माओवादीको प्रभाव क्षेत्रमा पूर्व प्रधानमन्त्री दाहालको उम्मेदवारी, माओवादी–एकीकृत समाजवादीको एकता र कांग्रेस भित्रको असन्तुष्टि मगरका लागि चुनौती हुन् ।

मगर समुदाय बाहुल यो क्षेत्रबाट पूर्व प्रधानमन्त्री दाहाललाई पराजि गर्ने मगरको दावी छ । जितका लागि उनले कडा मिहनेत गर्नुपर्नेमा भने शंका छैन ।