नागरिकसँग एजेन्डा संकलन गर्दै चुनावी मैदानमा

चुनावी अभियानका क्रममा भण्डारीले समाज रूपान्तरण, युवा रोजगारी, महिला सशक्तीकरण तथा वैकल्पिक राजनीतिक विचारधारालाई प्राथमिकतामा राख्दै मतदातासँग संवाद गर्दै आएकी छन् । पार्टीको चुनाव चिन्ह ‘तारा’ लिएर उनी चुनावी मैदानमा होमिएकी हुन् ।

०००

काठमाडौं क्षेत्र नम्बर १ बाट नेपाली कम्युनिष्ट पार्टी (नेकपा) का तर्फबाट प्रतिनिधिसभा सदस्य पदका लागि मेनुका भण्डारीले उम्मेदवारी दर्ता गरेकी छन् ।

आगामी फागुन २१ गते हुने प्रतिनिधि सभा निर्वाचनका लागि उनले माघ ६ गते मुख्य निर्वाचन अधिकृतको कार्यालयमा उम्मेदवारी दर्ता गराएकी हुन् ।

सिन्धुली जिल्लामा जन्मिएकी भण्डारीले स्नातक तहसम्मको अध्ययन पूरा गरेकी छन् । २०५४ साल असोज १३ गते जन्मिएकी भण्डारीको हालको स्थायी ठेगाना काठमाडौं महानगरपालिका रहेको छ ।

उनका बुबाको नाम मोहनाथ भण्डारी र पतिको नाम सागर भट्टराई हो । उनी नेपाली कम्युनिष्ट पार्टीकी सक्रिय सदस्य तथा कार्यकर्ता हुन् ।

मेनुका भण्डारी उम्मेदवार बनेको काठमाडौं–१ क्षेत्रमा बहुपक्षीय प्रतिस्पर्धा देखिएको छ । यस क्षेत्रमा नेकपा (एमाले) बाट मोहनराज रेग्मी, राप्रपाबाट रविन्द्र मिश्र, नेपाली कांग्रेसबाट प्रबल थापा तथा राष्ट्रिय स्वतन्त्र पार्टीबाट रञ्जु दर्शनाजस्ता उम्मेदवारहरू चुनावी मैदानमा छन् ।

चुनावी अभियानका क्रममा भण्डारीले समाज रूपान्तरण, युवा रोजगारी, महिला सशक्तीकरण तथा वैकल्पिक राजनीतिक विचारधारालाई प्राथमिकतामा राख्दै मतदातासँग संवाद गर्दै आएकी छन् । पार्टीको चुनाव चिन्ह ‘तारा’ लिएर उनी चुनावी मैदानमा होमिएकी हुन् ।

नेपाली कम्युनिष्ट पार्टीकी उम्मेदवार भण्डारी पार्टीको केन्द्रीय सदस्यको जिम्मेवारीमा समेत रहेकी छन् । उनले आफ्नो चुनावी एजेन्डा नागरिकहरूसँग प्रत्यक्ष संवाद गरेर संकलन गरेको बताएकी छन् ।

'एजेन्डा नागरिकसँगै बसेर संकलन गरेका हौँ । यहाँका वास्तविक समस्या के हुन् भनेर समूह बनाएर छलफल गर्दै संकलन गरेका छौँ,' उनले भनिन् ।