पालिकाको अनुभव संसद् पुर्‍याउने चाहना

२०५४ सालमा बाङ्गेमरोठ गाविस अध्यक्ष र २०७४ सालमा झिमरुक गाउँपालिका अध्यक्षमा निर्वाचित उनले भ्रष्टाचार विरुद्ध शून्य सहनशीलता, पारदर्शिता र जनसहभागितालाई प्राथमिकता दिए ।

०००

प्यूठानको झिमरुक–४, बाङ्गेमरोठमा १ वैशाख २०२३ मा जन्मिएका तिलकबहादुर जीसीले विद्यार्थी जीवनमै राजनीति शुरु गरे । २०३६ सालको जनमत संग्रहताका नेकपा (मसाल)को विद्यार्थी संगठन अखिल (छैटौं) मा आबद्ध उनले कानूनमा स्नातक गरेका छन् ।

२०४० देखि २०४६ सालसम्म भूमिगत जीवन बिताए । भूमिगतकालमै अखिल छैटौंको चौथो अधिवेशनबाट प्युठान जिल्ला अध्यक्ष निर्वाचित भए । पर्चा–पम्पलेट बोकेको आरोपमा प्रहरीले पक्राउ गरेर तौलिहवा र भैरहवा हिरासतमा राख्यो ।

२०४५ सालमा ललितपुरको गोदावरीमा सम्पन्न युवक संघको सम्मेलनबाट केन्द्रीय सदस्यमा निर्वाचित जीसी अखिल नेपाल राष्ट्रिय जनमोर्चा हुँदै राष्ट्रिय जनमोर्चाको केन्द्रीय कमिटीमा पुगे । प्रतिनिधिसभा सदस्यमा उम्मेदवारी दिन उनले मसालको लुम्बिनी प्रदेश प्रवक्ताबाट राजीनामा दिएका छन् ।

२०५४ सालमा बाङ्गेमरोठ गाविस अध्यक्ष र २०७४ सालमा झिमरुक गाउँपालिका अध्यक्षमा निर्वाचित उनले भ्रष्टाचार विरुद्ध शून्य सहनशीलता, पारदर्शिता र जनसहभागितालाई प्राथमिकता दिए ।

गत निर्वाचनमा उनको पार्टीबाट उम्मेदवारी दिएकी दुर्गा पौडेल एमाले उम्मेदवारसँग पराजित भइन् । २०७४ मा भने एमाले र माओवादी केन्द्रको समर्थनमा पौडेल निर्वाचित भएकी थिइन् ।

२०७९ मा समानुपातिकतर्फ जनमोर्चाले ९ हजार ९५९ मत प्राप्त गरेको थियो ।