जनमतका समानुपातिक सांसद अहिले नाउपाका उम्मेदवार

सीके राउतले जनमत पार्टी गठन गर्दा अब्दुल खानको सक्रिय भूमिका थियो । उनै अब्दुल अहिले जनमत छोडेर नागरिक उन्मुक्ति पार्टीको उम्मेदवार बनेका छन् ।

०००

नागरिक उन्मुक्ति पार्टी (नाउपा) ले बर्दिया क्षेत्र नम्बर १ मा अब्दुल खानलाई प्रतिनिधिसभा उम्मेदवारको रूपमा अघि सारेको छ ।

१ भदौ २०४३ मा बर्दियाको गुलरिया नगरपालिका–११ ओसीपुरमा जन्मिएका खान २०६८ सालदेखि राजनीतिमा सक्रिय छन् । सीके राउतको नेतृत्वमा जनमत पार्टी गठन गर्दा उनले सक्रिय भूमिका निभाएका थिए ।

‘रुलअफदी एनजीओ, आईएनजीओ इन डेभलपिङ मधेश’ भन्ने कार्यक्रममा स्वयंसेवकको रूपमा काम गर्दागर्दै राउतसँग सम्पर्कमा पुगेपछि उनी राजनीतिमा जोडिएका थिए ।

२०६८ सालमा राउतको नेतृत्वमा पार्टी गठन गर्न लागिपरेका खानले २०६९ सालमा डा. राउतद्वारा स्थापित स्वतन्त्र मधेश गठबन्धनको राष्ट्रिय प्रवक्ताको जिम्मेवारी सम्हाले ।

यो पार्टीले २०७० र २०७४ सालको चुनावमा भाग लिएन । २०७९ को चुनावमा भाग लियो र राष्ट्रिय दलको रूपमा उदायो । त्यसबेला जनमत पार्टीले प्रत्यक्षमा एक र समानुपातिकतर्फ पाँच सिट जितेको थियो । खान समानुपातिक निर्वाचन सांसद बने ।

२०७७ मा भएको जनमत पार्टीको महाधिवेशनबाट उपाध्यक्षमा निवार्चित खानले सांसद् भएसँगै राजकीय जिम्मेवारी पनि पाए । ११ पुस २०७९ मा विनाविभागीय मन्त्री भए । ३ माघ २०७९ मा खानेपानी मन्त्री बने । १७ चैत २०७९ मा मन्त्री पदबाट राजीनामा दिए ।

११ भदौ २०८० मा प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिको सभापति भए । संसदीय समितिको सभापतिका रूपमा खानले २७ भदौ २०८२ सम्म काम गरे ।

फेरि जनप्रतिनिधि हुने ध्याउन्नमा रहेका खानले स्नातकसम्म अध्ययन गरेका छन् । सुरुमा मदरसा शिक्षा पढेका उनले पछि स्थानीय विद्यालयमा भर्ना भएर एसएलसी, आईएससी पास गर्दै पब्लिक हेल्थ विषयमा स्नातक गरेका हुन् ।

समानुपातिकपछि खान प्रत्यक्षतर्फ प्रतिनिधिसभा सदस्यको चुनावी मैदानमा छन् । जनमत पार्टी छाडेर उनी नागरिक उन्मुक्ति पार्टी नेपालबाट बर्दिया–१ मा उम्मेदवार बनेका हुन् ।

२०७९ को चुनावमा बर्दिया–१ बाट नेपाली कांग्रेसका सञ्जयकुमार गौतम विजयी भएका थिए । ३० हजार ६११ मत ल्याएर गौतम विजयी हुँदा एमालेका लक्ष्मणराज ज्ञवालीले २६ हजार १५५, नाउपाका ठाकुरसिंह थारुले २३ हजार ९९३ मत र रास्वपाका प्रवेश भुसालले ११ हजार ४ मत ल्याएका थिए ।

यसपटक पनि यस क्षेत्रमा कांग्रेसबाट उनै गौतम उम्मेदवार छन् । एमालेबाट शालिकराम अधिकारी, नेपाली कम्युनिस्ट पार्टीबाट विष्णुप्रसाद चौधरी उम्मेदवार छन् । अघिल्लो निर्वाचनमा नाउपाबाट उम्मेदवार रहेका ठाकुरसिंह थारु यस पटक रास्वपाबाट उम्मेदवार छन् ।