पार्टीमा सर्वस्वीकार्य वीरकाजीको संसदीय परीक्षा

नेपाली कांग्रेसका उम्मेदवार वीरकाजी राई सरल र शालिन व्यक्तिका रूपमा चिनिन्छन् । उनी पार्टीको सर्वस्वीकार्य उम्मेदवारका रूपमा प्रतिनिधिसभा निर्वाचनमा होमिएका छन् ।
०००

खोटाङमा नेपाली कांग्रेस भित्र उम्मेदवारका दर्जनौं आकांक्षी थिए । तर २१ फागुनमा हुने प्रतिनिधिसभा निर्वाचनमा महाधिवेशन प्रतिनिधि वीरकाजी राईले बाजी मारे ।

विशेष महाधिवेशनबाट सभापति चुनिएका गगन थापाबाट टिकट लिएका राई चुनावी अभियानमा निस्किसकेका छन् । उनका लागि संसदीय चुनाव लड्न लागेको पहिलो अनुभव हो ।

२०३१ वैशाख १५ गते खोटाङको केपिलासगढी गाउँपालिका–१ फेदीमा जन्मिएका राई सरल र शालिन व्यक्तिका रूपमा चिनिन्छन् । सबैप्रति समान व्यवहार गर्ने उनको स्वभावबाट सबै परिचित छन् ।

यही स्वभावका कारण उनको उम्मेदवारीलाई खोटाङका समग्र कांग्रेसजनले स्वीकार गरेका छन् ।

खोटाङ कांग्रेस भित्र एउटा रोग छ, त्यो हो घात अन्तर्घात । एकले टिकट पाउँदा अर्को हराउन लाग्ने यहाँको परम्परा जस्तै हो । तर वीरकाजीको हकमा सबै नेताहरू एक ठाउँमा उभिएका छन् ।

वीरकाजीले बीएसम्मको औपचारिक शिक्षा हासिल गरेका छन् । २०४७ सालमा नेविसंघको सदस्य बनेर
राजनीतिमा जोडिएका उनी २०७४ को निर्वाचनमा समानुपातिक उम्मेदवार बनेका थिए ।

फेदीकै कुहुडाँडा माविमा पढ्दै गर्दा नेविसंघको सदस्यता लिएर औपचारिक रूपमा राजनीति थालेका वीरकाजीले २०४८ देखि २०५२ सम्म कांग्रेसको गाउँ कार्यसमिति फेदीको सचिव बनेर काम गरे ।

२०५३ सालमा नेविसंघको जिल्ला सदस्य बने । २०५९ सालमा कांग्रेसको क्षेत्रीय सभापति, २०६२ मा सहसचिव र २०६७ मा सचिव भए ।

२०७२ सालमा जिल्ला सभापतिमा पराजित भएका उनी २०७९ मा महाधिवेशन प्रतिनिधि बने । तर उनी त्यही वर्ष कांग्रेस कोशी प्रदेशको सहमहामन्त्रीमा पनि पराजित भएका थिए ।