माओवादीमा निकै संघर्षशील नेताको रूपमा परिचित गैरे देवेन्द्र पौडेलले छोडेको क्षेत्रमा नेकपा उम्मेदवार बनेका छन् । उनलाई विरासत जोगाउने मौका छन् ।
०००
बागलुङ क्षेत्र नम्बर २ मा नेपाली कम्युनिस्ट पार्टी (नेकपा) को तर्फबाट प्रतिनिधिसभा सदस्यका उम्मेदवार हुन् ज्ञामनाथ गैरे ‘अनिल’ । यसअघिका दुई निर्वाचनमा यो क्षेत्रमा जित निकालेको नेकपा यस पटक राष्ट्रिय जनमोर्चाको आडमा चुनावी मैदानमा छ ।
गलकोट नगरपालिका-६ मा जन्मिएका गैरे माओवादीमा निकै संघर्ष गरेका नेताको रूपमा चिनिन्छन् । माओवादीको गण्डकी प्रदेश कमिटी उपाध्यक्षसमेत भइसकेका गैरे दु:ख गरेर अवसर नपाएका नेता हुन् ।
यस पटक भने यसै क्षेत्रबाट निर्वाचित नेता देवेन्द्र पौडेललाई नवलपरासी क्षेत्र नम्बर २ पठाएर नेकपाले गैरेलाई टिकट दिएको हो । गैरेलाई उम्मेदवार बनाउन यहाँका माओवादी एकजुट भएका थिए ।
पौडेलले २०७४ र २०७९ सालको निर्वाचनमा यो क्षेत्रबाट निर्वाचित भएका थिए । अहिले उनैको क्षेत्रमा गैरे उम्मेदवार छन् ।
अखिल क्रान्तिकारी बागलुङको अध्यक्षदेखि नेकपाको केन्द्रीय सदस्य रहेका गैरे २०५० सालबाट विद्यार्थी राजनीतिमा लागेका हुन् । २०५७ अखिल क्रान्तिकारी केन्द्रीय सचिवालय, २०५५ सालबाट भूमिगत जनयुद्ध हुँदै २०५९ मा पार्टी जिल्ला सेक्रेटरी भएका थिए । नेकपा माओवादी केन्द्रको गण्डकी प्रदेश उपाध्यक्ष हुँदै उनी हाल केन्द्रीय समिति सदस्य छन् ।
ज्ञामनाथ गैरे 'अनिल' का लागि यो निर्वाचन "संघर्षको फल" पाउने बेला हो। राष्ट्रिय जनमोर्चाको साथ र माओवादीको सांगठनिक आधार उनको जितको बलियो खम्बा हो।
गैरेलाई २०५४ र ५५ सालमा पक्राउ परी राज्य विरुद्धको अपराधमा समातेर जेल हालिएको थियो । नेपाली कम्युनिस्ट पार्टी नेकपाबाट बागलुङ-२ बाट चुनावी मैदानमा उत्रेका गैरे दुई दशकदेखि जनताकै माझमा भिजेका नेताको रूपमा चिनिन्छन् ।
उनी विगत दुई दशकभन्दा बढी समयदेखि पार्टी, संगठन र जनताको सेवामा सक्रिय छन् ।
तत्कालीन नेकपा (माओवादी) ले सञ्चालन गरेको जनयुद्धका क्रममा जेल जीवनसमेत बिताएका गैरेले २०५९ सालमा नेकपा (माओवादी) बागलुङ जिल्ला सेक्रेटरीको जिम्मेवारी कुशलतापूर्वक पूरा गरेका थिए । त्यसपछि पार्टीको केन्द्रीय समितिमा पुगेका उनले पार्टीको जिल्ला सचिवको जिम्मेवारी पनि निर्वाह गरेका थिए ।
पार्टी शान्तिपूर्ण राजनीतिक यात्रामा आएपछि गैरेले निरन्तर जनपक्षीय राजनीति, संगठन निर्माण र सामाजिक उत्तरदायित्वलाई प्राथमिकतामा राख्दै सक्रिय भूमिका निभाउँदै आएका छन् ।
नेकपा उम्मेदवार गैरेले सार्वजनिक गरेको प्रतिवद्धतापत्रमा सुशासन, सामाजिक न्याय र युवामुखी विकासलाई मुख्य प्राथमिकतामा राखिएको छ ।
एमालेकी मञ्जु शर्माको अघिल्लो अनुभव र कांग्रेसको 'नयाँ अनुहार' को चुनौतीलाई पार गर्नु नै उनको सफलताको मुख्य कडी हुनेछ।
उनले सडकको दयनीय अवस्था सुधार, सरकारी विद्यालय र अस्पतालको गुणस्तर अभिवृद्धि, कृषकलाई उत्पादनको उचित मूल्य र संरक्षण तथा स्वदेशमै रोजगारी सिर्जना गरी युवा पलायन रोक्ने प्रतिबद्धता जनाएका छन् ।
भ्रष्टाचारविरुद्ध कठोर नीति, सरकारी सेवामा पारदर्शिता, बजेट निर्माण र कार्यान्वयनमा इमानदार भूमिका निर्वाह गर्ने तथा शिक्षा, स्वास्थ्य र सडक पूर्वाधारलाई प्राथमिकतासहित आधुनिकीकरण गर्ने उनका प्रमुख एजेन्डा छन् ।
