प्रहरी अधिकृतदेखि राजनीतिको मैदानसम्म

लामो समयदेखि निश्चित व्यक्तिले मात्रै चुनाव लड्ने, जित्ने र राजनीतिलाई नै मागी खाने पेसा बनाएकाले एमालेबाट विद्रोह गरेर आफूले उम्मेदवारी दिएको उनी बताउँछन् ।

०००

दैलेखको भगवतीमाई गाउँपालिका–१ मा जन्मिएका नन्दकिशोर बस्नेतलाई राष्ट्रिय स्वतन्त्र पार्टी (रास्वपा) ले दैलेख क्षेत्र नम्बर–१ बाट प्रतिनिधिसभा सदस्य उम्मेदवार बनाएको छ । उनले प्रवीणता प्रमाणपत्र तहसम्म अध्ययन गरेका छन् । 

नेकपा एमालेबाट उम्मेदवार सिफारिसमा परे पनि अन्तिम समयमा टिकट नपाउने भएपछि उनी रास्वपा प्रवेश गरे । लगत्तै रास्वपाले दैलेख-१ मा उनलाई उम्मेदवार बनायो ।

चुनावीमा मैदानमा रहेका बस्नेत आफूलाई एमाले लगायत अन्य दलका मतदाताले समेत मत दिने दाबी गर्छन् । हाल उनी नारायण नगरपालिका–१, दैलेख बजारमा बस्दै आएका छन् । 

उनी २०४४ सालदेखि २०६४ सालसम्म नेपाल प्रहरी हुँदै सशस्त्र प्रहरीको सिनियर अधिकृतबाट सेवा निवृत्त भएका व्यक्ति हुन् । त्यसपछि उद्योग व्यवसायमा संलग्न रहेका बस्नेत २०७१ सालमा नेपाल सरकारको औद्योगिक क्षेत्र व्यवस्थापन लिमिटेडको अध्यक्ष तथा महाप्रबन्धक समेत भइसकेका छन् । 

२०७८ सालबाट दैलेखमा होटल व्यवसाय सुरु गरी सामाजिक र राजनीतिक भूमिका सक्रिय हुँदै आएका थिए । बस्नेत पछिल्लो समय जिल्लामा खानेपानी पाइप निर्माण, टेलिफोनको टावर जडान र मर्मत तथा सार्वजनिक विकासको कामका लागि सरकारी निकाय र सरोकारवालाहरूलाई निरन्तर खबरदारी गर्दै आएका थिए । 

उनले विद्यालयहरूमा शैक्षिक सामग्री वितरण गर्ने, जिल्लाका परम्परागत संस्कृति मेला पर्व सञ्चालन गर्ने जस्ता काम समेत गर्दै आएका थिए ।

लामो समयदेखि निश्चित व्यक्तिले मात्रै चुनाव लड्ने, जित्ने र राजनीतिलाई नै मागी खाने पेसा बनाएकाले एमालेबाट विद्रोह गरेर आफूले उम्मेदवारी दिएको उनी बताउँछन् ।

केपी शर्मा ओली प्रधानमन्त्री र महेश बस्नेत उद्योग मन्त्री हुँदा औद्योगिक क्षेत्र व्यवस्थापन लिमिटेडको अध्यक्ष तथा महाप्रबन्धकका रूपमा दुई कार्यकाल काम गरेको अनुभव उनीसँग छ ।