फिल्मको पर्दादेखि हिमालको चुचुरोसम्म र अहिले राजनीतिक मञ्चसम्म पुगेको उनको यात्रा निरन्तर परिवर्तन र नयाँ चुनौती स्वीकार गर्ने प्रवृत्तिको उदाहरण हो ।
000
काठमाडौं क्षेत्र नम्बर ५ मा गतिशील लोकतान्त्रिक पार्टीबाट निशा अधिकारी चुनावी मैदानमा छिन् । उनको व्यक्तित्व फिल्म, साहसिक अभियान, सामाजिक अभियन्ता र अहिले राजनीतिसम्म फैलिएको छ ।
४ अक्टोबर १९८६ मा काठमाडौंमा जन्मिएकी निशाले सानैदेखि अभिनय र सार्वजनिक जीवनतर्फ रुचि देखाइन् । उनको सार्वजनिक यात्रा टेलिभिजनबाट सुरु भयो ।
हाँस्य श्रृंखला ‘घरबेटी बा’ ले उनलाई दर्शकमाझ चिनायो । त्यसपछि सन् २००९ मा फिल्म ‘मिसन पैसा’ मार्फत फिल्म अभिनयको करिअर थालिन् । फिल्ममा सफल भएपछि उनलाई उद्योगमा नयाँ सम्भावनायुक्त अनुहारका रूपमा हेरिन थालियो र लगातार फिल्म अफर आउन थाले ।
निशाको करिअरको महत्वपूर्ण मोड फिल्म ‘फर्स्ट लभ’ (२०१०) बाट आयो, जुन युवा पुस्तामाझ निकै लोकप्रिय बन्यो । त्यसपछि ‘सुनगाभा : डान्स अफ द अर्किड्स (२०१२) जस्तो फरक विषयवस्तु भएको फिल्ममा अभिनय गरेर आफू जोखिम लिन तयार कलाकार भएको सन्देश दिइन् ।
उनले अहिलेसम्म २७ वटा फिल्ममा अभिनय गरेकी छन् भने दर्जनौं म्युजिक भिडियोमा आफ्नो कला प्रस्तुत गरेकी छिन् ।
निशा अधिकारीका लागि यो निर्वाचन "हिमालको शिखरदेखि राजनीतिको शिखर" सम्म पुग्ने एउटा कठिन तर गौरवपूर्ण यात्रा हो।
समयसँगै निशाले विभिन्न व्यावसायिक र प्रयोगात्मक फिल्ममा काम गरिन् । केही परियोजनाका निर्माण पक्षमा पनि संलग्न भइन् । अभिनयसँगै उनी मोडलिङ, भिजे र सार्वजनिक वक्ताका रूपमा पनि सक्रिय रहिन् ।
मनोरञ्जनभन्दा बाहिर उनको अर्को पहिचान साहसिक यात्रासँग जोडिन्छ । उनी सगरमाथा आरोहण गर्ने पहिलो नेपाली अभिनेत्री बन्न सफल भइन् ।
सामाजिक मुद्दामा चासो राख्दै आएकी निशा शैक्षिक रूपमा ‘द्वन्द्व, शान्ति र विकास’ विषयमा विद्यावारिधि गर्दैछिन् । युवा पुस्ताको सहभागिता र नीतिगत सुधारको विषयमा उनले समय–समयमा आफ्ना विचार राख्दै आएकी थिइन् ।
यही रुचिले अन्ततः उनलाई औपचारिक राजनीतिमा ल्यायो । हालै उनले गतिशील लोकतान्त्रिक पार्टीमा प्रवेश गरेर केन्द्रीय भूमिकामा काम सुरु गरिन् ।
काठमाडौं–५ का सचेत र परिवर्तनकामी मतदाताहरूले यसपटक पुराना 'पाका' नेताहरूलाई रोज्छन् कि निशा जस्तो 'नयाँ र साहसी' अनुहारलाई, त्यो हेर्न बाँकी नै छ।
सोही दलबाट निशाले काठमाडौं क्षेत्र नम्बर ५ बाट प्रतिनिधिसभामा उम्मेदवारी दिएकी छिन् । हालै अनलाइनखबरसँग कुरा गर्दै उनले अबको १० वर्ष आफूले देशको लागि समर्पित गर्ने बताएकी छन् ।
व्यक्तिगत जीवनमा निशाले सन् २०१७ मा नेपाली राष्ट्रिय क्रिकेट टोलीका खेलाडी शरद भेषवाकरसँग विवाह गरिन् । यी दुईको तर्फबाट एक जना सन्तान छन् ।
फिल्मको पर्दादेखि हिमालको चुचुरोसम्म र अहिले राजनीतिक मञ्चसम्म पुगेको उनको यात्रा निरन्तर परिवर्तन र नयाँ चुनौती स्वीकार गर्ने प्रवृत्तिको उदाहरण हो ।
