१२ वर्षपछि एमालेको आफ्नै उम्मेदवार

किसान र पर्यटन व्यवसायीको छवि बनाएका थपलियाले एमालेको 'सूर्य' चिह्नमा मत हाल्न पाउने कार्यकर्ताको उत्साहलाई जितमा बदल्ने लक्ष्य राखेका छन्।

०००

२०७० सालको संविधानसभाको दोस्रो निर्वाचनपछि चितवन–३ मा एमालेले पहिलोपटक प्रत्यक्षमा आफ्नै उम्मेदवार उठाएको छ । २०७४ सालमा पुष्पकमल दाहाल प्रचण्डलाई समर्थन गरेको एमालेले २०७९ मा कांग्रेसबाट विद्रोह गरेर बागी उम्मेदवारी दिएका कांग्रेस केन्द्रीय सदस्य दिनेश कोइरालालाई साथ दियो ।

प्रत्यक्षमा आफ्नो उम्मेदवार नहुँदा पार्टीका भोटसमेत गुमाउँदै गएको एमालेले यसपटक भने  समर्थकलाई आफ्नै चुनाव चिह्नमा मत हाल्ने मौका दिएको छ । एमाले भरतपुर महानगर कमिटीका अध्यक्ष शंकर थपलिया उम्मेदवार छन् । माडी नगरपालिकाका ९ वटा वडा र भरतपुर महानगरका १९ वडा रहेको यो क्षेत्रमा एमालेले आफ्नो पुरानो मतलाई जोगाउने र प्रतिस्पर्धामा बाँडिएका मतको बीचबाट जित निकाल्ने दाउ हेरेको छ ।

एमालेले २०७९ को निर्वाचनमा सामुपातिकतर्फ १४ हजार ५२२ मत ल्याएको थियो ।

२०२६ सालमा पश्चिम चितवनको पटिहानीमा जन्मिएका नेकपा एमालेका उम्मेदवार थपलिया एक किसान, पर्यटन व्यवसायीसमेत हुन् । भरतपुर महानगरपालिका-२२ का थपलियाले वीरेन्द्र बहुमुखी क्याम्पस भरतपुरबाट प्रवीणता प्रमाणपत्र तहसम्मको अध्ययन गरेका छन् । २०४३ सालदेखि नै राजनीतिमा लागेका थपलियाले २०४८ सालमा एमालेको पार्टी सदस्यता लिएका थिए ।

युवा संघ, पटिहानीको संस्थापक अध्यक्ष बनेका थपलिया एमाले गाउँ कमिटीको उपसचिव, इलाका कमिटी हुँदै साविक चितवन–४ को सहइन्चार्ज बने । क्षेत्रीय अध्यक्ष समेत बनेका थपलिया एमाले भरतपुर महानगरकमिटीको अध्यक्षका रूपमा दोस्रो कार्यकाल काम गर्दै छन् ।

रोजगारीको सिलसिलामा २०५८ सालमा दक्षिण कोरिया पुगेका उनी ६ वर्ष बिताएर स्वदेश फर्किएका थिए । कृषि कर्मसँगै पटिहानीको पर्यटन क्षेत्रको विकासमा पनि उनी लागिरहेका छन् । पटिहानी पर्यटन विकास समितिको उपाध्यक्ष हुँदै अध्यक्ष बनेका थपलियाले नै पहिलो पटिहानी पर्यटन महोत्सव लगाएका थिए । पटिहानीमा रहेको अमर जनशक्ति कलेजको उपाध्यक्षसमेत भएका थपलिया विभिन्न सामाजिक संघसंस्थामा आवद्ध छन् ।

नेकपाले भरतपुर महानगरपालिकामा राम्रो विकास गरेर चर्चामा आएकी रेनु दाहाललाई उम्मेदवार बनाएको छ । रास्वपाले निवर्तमान प्रतिनिधिसभा सदस्य सोविता गौतम र कांग्रेसका टेकप्रसाद गुरूङलाई उठाएको छ ।