शिक्षण, कलाकारितासँगै राजनीति

सिन्धु जलेसा बुढाथोकी कम्युनिष्ट आन्दोलनमा अपरिचित नाम होइन । उनी २०४३ सालमा अनेमसंघ नवलपरासीको सचिव थिइन् ।

भूमिगत कालमा गुल्मी र बाग्लुङमा झरना सांस्कृतिक परिवारको नामबाट पार्टीको संगठनलाई अगाडि बढाउन लागिन् । चार दशकदेखि कम्युनिष्ट राजनीतिमा सक्रिय उनले नवलपरासी–१ मा नेपाली कम्युनिष्ट पार्टीबाट उम्मेदवारी दिएकी छन् ।

२०२६ सालमा अर्घाखाँचीमा जन्मिएकी बुढाथोकीको स्थायी ठेगाना नवलपरासी बर्दघाट नगरपालिका–२, चिसापानी हो । दुई दशकभन्दा बढी शिक्षण गरेकी उनले विद्यावारिधि गरेकी छन् ।

सानै उमेरदेखि कला क्षेत्रमा लागेकी उनले नाम र थरको बीचमा ‘जलेसा’ लेख्ने गरेकी छिन् । कलाकारितामा प्रवेश गरेपछि ‘जलेसा’ लेख्न थालेकी हुन् । माइतीको थर बुढाथोकी र घरतर्फ आचार्य हो ।

बुढाथोकी २०७० सालमा एमालेबाट राष्ट्रिय सभा सदस्य बनेकी थिइन् । २०७४ सालमा प्रतिनिधिसभा सदस्य निर्वाचनमा नवलपरासी–१ बाटै टिकट पाएकी थिइन् । उम्मेदवारी दर्ताको दिन पार्टीले जनता प्रगतिशील पार्टीका अध्यक्ष हृदयेश त्रिपाठीलाई समर्थन गर्ने निर्णय भएपछि उनी उठ्न पाइनन् ।

२०७८ मा पार्टी विभाजित हुँदा एमालेमै बसेकी उनी केही महिनाअघि मात्रै नेपाली कम्युनिष्ट पार्टी (नेकपा) मा प्रवेश गरिन् ।

जेनजी आन्दोलनपछि माओवादी केन्द्र, एकीकृत समाजवादी लगायत मिलेर नेकपा बन्यो । २०७९ मा समानुपातिकमा माओवादी केन्द्रले ३ हजार २९६ र एकीकृत समाजवादीले ४०३ मत प्राप्त गरेको थियो ।

गत निर्वाचनमा माओवादी केन्द्र, एकीकृत समाजवादी, जनमोर्चा लगायतको समर्थन पाएको कांग्रेसका विनोद चौधरी २९ हजार ५१९ ल्याएर निर्वाचित भए । त्यतिबेला एमाले समर्थित हृदयेश त्रिपाठीले २२ हजार ३२८ भोट ल्याए । उनले यसपटक जनता समाजवादी पार्टी (जसपा), नेपालबाट उम्मेदवारी दिएका छन् ।

सिन्धु जलेसाले कांग्रेसका विनोद चौधरी, एमालेका रामप्रसाद पाण्डे, रास्वपाका विक्रम खनाल, जनमत पार्टीका गणेशबहादुर चौधरी, राप्रपाका नवनितकुमार मिश्र लगायतसँग प्रतिस्पर्धा गर्दैछिन् ।