बायोटेक इन्जिनियरिङबाट राजनीतिमा
राष्ट्रिय स्वतन्त्र पार्टी (रास्वपा) ले दाङ–२ मा सहमहामन्त्री विपिन आचार्यलाई उम्मेदवार बनाएको छ । २०४६ सालमा तुलसीपुरको टरिगाउँमा जन्मिएका आचार्य बायोटेक इन्जिनियर हुन् ।
२०५८ सालमा दीपशिखा आवासीय विद्यालयबाट प्रवेशिका उत्तीर्ण गरेका उनले २०६६ सालमा भारतबाट बायोटेक इन्जिनियरिङको अध्ययन पूरा गरे । २०६९ सालमा व्यवस्थापन संकायमा स्नातकोत्तर गरेका छन् । केही समय ग्यालेक्सी फोरके टिभीमा क्रिएटिभ डाइरेक्टरका रूपमा समेत काम गरेको अनुभव छ ।
२०७९ को चुनावमा बाचापत्र तयार पार्ने, विधानको ‘प्राइमरी फ्रेमवर्क’ बनाउने, मोबाइल एप निर्माणमा सक्रिय भूमिका खेले । रास्वपाका संस्थापक उनी सहमहामन्त्रीको जिम्मेवारीमा छन् ।
गत निर्वाचनमा यो क्षेत्रमा रास्वपाले समानुपातिकतर्फ १३ हजार ३३ मत प्राप्त गरेको थियो । प्रत्यक्षतर्फ रास्वपाका विशाल अधिकारी १५ हजार ८६१ मत सहित तेस्रो स्थानमा आएका थिए ।
२०७९ को चुनावमा प्रतिनिधि सभामा तत्कालीन नेकपा माओवादी केन्द्रकी रेखा शर्मा विजयी भएकी थिइन् भने एमाले महासचिव शंकर पोखरेल दोस्रो भएका थिए ।
आचार्यले संसदीय चुनावमा प्रतिस्पर्धा गर्न लागेको पहिलोपटक हो । आचार्यले यो क्षेत्रमा एमालेका महासचिव शंकर पोखरेल, कांग्रेसका किरणकिशोर घिमिरे र नेपाली कम्युनिष्ट पार्टीका निर्मल आचार्य लगायतसँग प्रतिस्पर्धा गर्दैछन् ।
Battleground Analysis
अनुकूलता
- बायोटेक इन्जिनियरिङमा स्नातक र व्यवस्थापनमा स्नातकोत्तर उनी रास्वपाको एप तथा बाचापत्र निर्माणको भूमिकाले गर्दा शिक्षित र प्रविधिप्रेमी युवा मतदातामाझ आकर्षण छ ।
- रास्वपाका संस्थापक सदस्य तथा सहमहामन्त्री जस्तो शक्तिशाली पदमा रहेकाले उनलाई पार्टीको केन्द्रीय स्रोत र साधन परिचालनमा सहजता छ । अघिल्लो निर्वाचनमा यस क्षेत्रमा रास्वपाले पाएको मत र रास्वपाको आक्रामक प्रचारशैलीले फाइदा हुन सक्ने सम्भावना छ ।
- मतदाताले विकल्प खोजिरहेका बेला उनी 'फ्रेस' र भिजनरी उम्मेदवारका रूपमा प्रस्तुत भएकाले एमाले र कांग्रेसको 'कोर' भोट काट्न सक्ने देखिन्छ ।
प्रतिकूलता
- भूगोलमा काम गरेका स्थानीय नेताहरूलाई छोडेर केन्द्रबाट विपिनलाई टिकट दिइएको भन्दै स्थानीय स्तरका रास्वपा कार्यकर्ताहरूले हस्ताक्षर अभियान चलाएर असन्तुष्टि व्यक्त गरेका थिए । यो आन्तरिक विवादले चुनावमा नकारात्मक असर पार्न सक्छ ।
- समानुपातिक मत जोगाउँदै ठूला दलको वर्षौँदेखिको सांगठनिक जालो तोड्नु मुख्य चुनौती हुनेछ ।
- उनकी पत्नी सहकारी संस्थाको रकम हिनामिना प्रकरणमा मुछिएकाले त्यसका चिर्नु कठिन हुनेछ ।
विपिन कुमार आचार्यको प्रोफाइल पढेर तपाईंलाई कस्तो लाग्यो ?
निकटतम प्रतिद्वन्द्वी
