व्यवस्थापकीय कुशलता र ट्रेड युनियनका अगुवा
‘जयतु संस्कृतम्’ आन्दोलनका सेनानी ऋषिराम शर्मा घिमिरेका छोरा हुन्, किरणकिशोर घिमिरे । किरणकिशोरका दाजु कृष्णकिशोर पञ्चायत विरुद्धको आन्दोलनमा लागेका थिए ।
६३ वर्षीय किरणकिशोर २०३६ सालदेखि पञ्चायती शासनको विरोधमा लागे । २०४६ को जनआन्दोलन पश्चात् मजदूरको हकहितका लागि ट्रेड युनियन आन्दोलनमा सक्रिय भए ।
घिमिरेको जनकपुर रेलवेको प्रमुख कार्यकारी अधिकृत र नेपाल यातायात संस्थानको प्रबन्धक भएर १८ वर्ष काम गरेको अनुभव छ । यी कार्यालयमा उनको कुशल व्यवस्थापकीय क्षमताको अहिले पनि स्मरण गरिन्छ ।
दाङमा दीप ज्योति अस्पताल र प्राविधिक शिक्षालयको स्थापनामा महत्त्वपूर्ण भूमिका खेलेका उनले वन विकास र उद्योग मार्फत स्थानीयलाई रोजगारी दिन पहल गरेका छन् ।
अर्थशास्त्र, राजनीतिशास्त्र र समाजशास्त्र पढेका उनले भारतको अवध विश्वविद्यालयबाट स्नातकोत्तर गरेका छन् ।
दाङ–२ मा किरणकिशोरले एमालेका शंकर पोखरेल, नेपाली कम्युनिष्ट पार्टीका निर्मल आचार्य, राष्ट्रिय स्वतन्त्र पार्टीका विपिनकुमार आचार्य लगायतसँग प्रतिस्पर्धा गर्दैछन् ।
यस क्षेत्रबाट अघिल्लो निर्वाचनमा तत्कालीन माओवादी केन्द्रकी रेखा शर्मा विजयी भएकी थिइन् ।
२०७९ मा यो क्षेत्रमा कांग्रेसले माओवादी केन्द्रलाई समर्थन गरेको थियो । कांग्रेसले समानुपातिकमा १९ हजार ५९१ मत पाएको थियो । समानुपातिकमा एमालेको २३ हजार ५६८, रास्वपाको १३ हजार ३३, माओवादीको १० हजार ८२० र राष्ट्रिय प्रजातन्त्र पार्टीले ३ हजार ९५ मत पाएको थियो ।
Battleground Analysis
अनुकूलता
- ‘जयतु संस्कृतम्’ आन्दोलनका सेनानी ऋषिराम शर्मा घिमिरेका छोरा हुनु र २०३६ सालदेखि नै पञ्चायत विरुद्धको आन्दोलनमा होमिएको उनको पारिवारिक पृष्ठभूमिले पुरानो पुस्ताका र निष्ठावान् कांग्रेस मतदातामाझ बलियो प्रभाव पार्न सक्छ।
- जनकपुर रेलवे र नेपाल यातायात संस्थान जस्ता सरकारी निकायमा १८ वर्ष प्रमुख कार्यकारी भएर काम गरेको अनुभव तथा दाङमा अस्पताल र प्राविधिक शिक्षालय स्थापनामा खेलेको भूमिकाले उनलाई एक 'काम गर्न सक्ने' र 'कुशल व्यवस्थापक' उम्मेदवारका रूपमा स्थापित गरेको छ।
- २०७९ को समानुपातिक मत परिणाम अनुसार यस क्षेत्रमा कांग्रेसको १९ हजार ५९१ मत छ। अघिल्लो निर्वाचनमा माओवादीलाई समर्थन गरेको कांग्रेसले यसपटक आफ्नै प्रभावशाली उम्मेदवार पाएकाले यो मत सुरक्षित हुनु र एमाले विरुद्धको मुख्य शक्तिका रूपमा उभिनु उनको प्रमुख सबल पक्ष हो।
प्रतिकूलता
- एमालेका महासचिव एवम् पूर्व मुख्यमन्त्री शंकर पोखरेल र नेकपाका निर्मल आचार्य जस्ता स्थापित नेताहरूसँगको प्रतिस्पर्धा उनका लागि कठिन छ। अघिल्लो चुनावमा समानुपातिकतर्फ एमालेले पाएको सबैभन्दा धेरै मत र उसको बलियो संगठनलाई तोड्न ठूलो चुनौती हुनसक्छ ।
- अघिल्लो पटक कांग्रेस र साविक माओवादी मिलेर चुनाव लडेका थिए, तर यसपटक कांग्रेस एक्लै छ। त्यसैले किरणकिशोरलाई मतको गणित मिलाउन सकस पर्नसक्छ ।
- नयाँ मतदाता र परम्परागत दलप्रति असन्तुष्ट मत रास्वपाले काट्ने सम्भावना रहेकाले कांग्रेसको अपेक्षित जितमा यो पनि एउटा तगारो बन्न सक्छ।
किरण किशोर घिमिरेको प्रोफाइल पढेर तपाईंलाई कस्तो लाग्यो ?
