अमेरिकाबाट कानुनमा स्नातकोत्तर, उज्यालोबाट उम्मेदवार

एक युवा कानुन व्यवसायी, प्राध्यापक तथा सामाजिक अभियन्ता हुन्- केशव भट्टराई  । उनी आगामी प्रतिनिधिसभा निर्वाचनमा रुपन्देही निर्वाचन क्षेत्र नम्बर–५ बाट उज्यालो नेपाल पार्टीका तर्फबाट उम्मेदवार बनेका छन् ।

विधि शासन, सुशासन र जवाफदेही राजनीतिलाई आफ्नो मूल मन्त्र बनाएका भट्टराई संसदलाई शक्ति प्रदर्शनको थलो नभई जनताका समस्या समाधान गर्ने थलोको रूपमा स्थापित गर्ने लक्ष्य लिएको बताउँछन् ।

भट्टराईले नेपाल र अमेरिकाबाट कानुन तथा सुशासनका क्षेत्रमा उच्च शिक्षा हासिल गरेका छन् । संयुक्त राज्य अमेरिकाको ओहायो नर्दर्न युनिभर्सिटीबाट 'रुल अफ ल एण्ड डेमोक्रेटिक गभर्नेन्स' मा स्नातकोत्तर उनी त्रिभुवन विश्वविद्यालयबाट द्वन्द्व, शान्ति तथा विकास अध्ययनमा स्नातकोत्तर हुन् ।

यसअघि उनले पूर्वाञ्चल विश्वविद्यालयबाट कानुनमा स्नातक तहसम्म अध्ययन गरेका छन् । 

पेशागत रूपमा कानुन व्यवसायमा संलग्न उनी आर्थिक रूपमा कमजोर, घरेलु हिंसा पीडित, महिला तथा जातीय विभेदमा परेकाहरूका लागि निःशुल्क कानुनी सेवा प्रदान गर्दै आएका छन् ।

नेशनल ल कलेजमा सह-प्राध्यापकको रूपमा अन्तर्राष्ट्रिय कानुन र शासन प्रणाली अध्यापन गराउँदै आएका भट्टराईले कानुन, मिडिया र उद्योग क्षेत्रमा नेतृत्वदायी भूमिका निर्वाह गर्दै रोजगारी सिर्जनामा योगदान दिइरहेका छन् ।

नेपाल युवा वकिल संघका अध्यक्ष रहेका उनी उच्च अदालत बार एसोसिएसन वीरगञ्जका कार्यसमिति सदस्य पनि हुन् । यसैगरी उनी अन्तर्राष्ट्रिय सम्बन्ध समिति, नेपाल बार एसोसिएसनका सदस्य पनि हुन् ।

भट्टराई यो चुनावमा आर्थिक रूपमा कमजोर, महिला, बालबालिका र पीडितहरूको न्यायमा पहुँच सुनिश्चित गर्ने, युवाहरूलाई शैक्षिक अवसर, प्रशिक्षण र नेतृत्व विकासमार्फत सशक्त बनाउने एजेन्डासहित चुनावी मैदानमा छन् ।

सामुदायिक सुरक्षा, पारदर्शी शासन र भ्रष्टाचार नियन्त्रणमा सक्रिय भूमिका खेल्ने, स्थानीय व्यवसाय, उद्योग र युवा उद्यमशीलतामा सहयोग पुर्‍याउँदै विकासको वातावरण सिर्जना गर्ने एजेन्डासहित उनी भोट मागिरहेका छन् ।

जातीय, सांस्कृतिक र सामाजिक विभेद अन्त्य गर्दै समान अवसरको समाज निर्माण गर्ने र कानुन, नियम र लोकतान्त्रिक मूल्यमान्यतालाई दृढतापूर्वक संरक्षण गर्ने एजेन्डा पनि उनले अगाडि सारेका छन् ।

यसका साथै, स्थानीय मुद्दा, कृषकका समस्या र सीमा क्षेत्रका चुनौतीहरूलाई सम्बोधन गर्ने भट्टराईको विशेष प्राथमिकता रहेको छ ।

'म मेरो सार्वजनिक सेवा र शासनसम्बन्धी दृष्टिकोणलाई जनताको सार्वभौम निर्णयअगाडि प्रस्तुत गर्दैछु,' भन्ने उद्घोषसहित चुनावी मैदानमा होमिएका भट्टराईको रुपन्देही–५ लाई समावेशी विकास र जवाफदेही प्रतिनिधित्वको नमुना बनाउने प्रतिबद्धता छ ।