थाहाका पहिलो मेयर संसद्को यात्रामा

२०७४ सालको स्थानीय निर्वाचनमा थाहा नगरपालिकाको मेयर निर्वाचित विष्टसँग स्थानीय शासन र जनप्रतिनिधिको भूमिकाको अनुभव छ ।

०००

नेपाली कम्युनिस्ट पार्टी (नेकपा) ले मकवानपुर क्षेत्र नम्बर २ बाट लवशेर विष्टलाई प्रतिनिधिसभा सदस्यको उम्मेदवार बनाएको छ ।

५४ वर्षीय विष्ट मकवानपुरको थाहा नगरपालिकाका स्थायी बासिन्दा हुन् । उनले रत्नराज्य क्याम्पसबाट आईएसम्मको अध्ययन पूरा गरेका छन् ।

उनी मध्यमवर्गीय परिवारको पृष्ठभूमिबाट राजनीतिमा उदाएका नेता हुन् । उनी जनमुखी नेता रुपचन्द्र विष्टका सहकर्मीका रूपमा सामाजिक अभियानमा सक्रिय रहँदै आएका छन् । 

जनमोर्चा नेपालबाट राजनीति सुरु गरेका विष्ट हाल नेकपामा आवद्ध छन् । उनी स्थानीय आवश्यकतालाई प्राथमिकतामा राख्ने नेताका रूपमा चिनिन्छन् ।

२०७४ सालको स्थानीय तह निर्वाचनमा विष्ट थाहा नगरपालिकाको पहिलो नगर प्रमुखमा निर्वाचित भए ।

नगर प्रमुखका रूपमा उनले स्थानीय विकास, आधारभूत पूर्वाधार, सेवा प्रवाह र जनउत्तरदायी नेतृत्वलाई प्राथमिकतामा राखेर काम गरे । यही कार्यकालले उनलाई स्थानीय शासन र जनप्रतिनिधिको भूमिकामा अनुभवी बनायो ।

विष्ट राजनीतिसँगै विभिन्न सामाजिक र व्यावसायिक संस्थामा पनि सक्रिय छन् ।

मकवानपुर निर्माण व्यवसायी संघको सचिव भएर काम गरेका विष्टले मकवानपुर उद्योग वाणिज्य संघमा कार्यसमिति सदस्य हुँदै उपाध्यक्षसम्मको जिम्मेवारीमा पुगेका छन् ।