शहरी विकास र महिला सशक्तीकरणका एजेन्डा

पार्टी भित्र महिला अधिकार, लोकतन्त्र, सुशासन र समावेशी राजनीतिक अभ्यासका विषयमा सक्रिय रहँदै आएकी बास्तोला संगठनात्मक राजनीतिमा खारिएको अनुहारका रूपमा चिनिन्छिन् ।

०००

काठमाडौं जिल्लाको प्रतिनिधिसभा निर्वाचन क्षेत्र नम्बर ९ बाट नेपाली कांग्रेसकी उम्मेदवार नानु बास्तोला पार्टी संगठन, लोकतान्त्रिक मूल्य र महिला अधिकारको मुद्दा बोकेर चुनावी मैदानमा उत्रिएकी नेतृ हुन्।

४४ वर्षीया बास्तोलाको हाल स्थायी ठेगाना काठमाडौं महानगरपालिकामा रहेको छ। उनले स्नातकोत्तर तहसम्मको औपचारिक शिक्षा पूरा गरेकी छिन्।

राजनीतिक रूपमा नानु बास्तोला लामो समयदेखि नेपाली कांग्रेससँग आबद्ध रहँदै आएकी छिन् । विशेष महाधिवेशनबाट केन्द्रीय सदस्यमा निर्वाचित भएकी उनी खुला महिलातर्फबाट चयन भएकी नेतृ हुन् ।

पार्टी भित्र महिला अधिकार, लोकतन्त्र, सुशासन र समावेशी राजनीतिक अभ्यासका विषयमा सक्रिय रहँदै आएकी बास्तोला संगठनात्मक राजनीतिमा खारिएको अनुहारका रूपमा चिनिन्छिन् ।

काठमाडौं-९ भित्र पर्ने शहरी तथा अर्ध–शहरी क्षेत्रका समस्या शिक्षा, स्वास्थ्य, यातायात व्यवस्थापन, रोजगारी र आधारभूत शहरी सेवाको सुधारलाई उनले आफ्नो मुख्य चुनावी एजेन्डा बनाएकी छन् ।

साथै, महिला सशक्तीकरण, सामाजिक न्याय र लोकतान्त्रिक मूल्यको सुदृढीकरणलाई उनले प्रतिनिधिसभामा प्राथमिकताका साथ उठाउने प्रतिबद्धता व्यक्त गरेकी छन्।

नेपाली कांग्रेसको नीतिअनुसार विकास निर्माणलाई तिव्रता दिने, सुशासनलाई मजबुत बनाउने र जनताको हितलाई केन्द्रमा राखेर काम गर्ने दृष्टिकोण बास्तोलाको राजनीतिक धार हो ।

काठमाडौं–९ जस्तो प्रतिस्पर्धात्मक क्षेत्रमा ठूला दलका अनुभवी उम्मेदवारहरूसँग प्रतिस्पर्धा गर्नुपर्ने अवस्थाबीच पनि उनी संगठन, पार्टी संरचना र महिला नेतृत्वको मुद्दालाई आफ्नो मुख्य शक्ति मान्छिन्।